ORANJESTAD (AAN): Directiva di Plataforma Nacional Herencia di Sclavitud na Aruba (PNHSA)
kier comparti cu comunidad Arubano e relato di nan prome aña di existencia.
Un aña y mei pasa, algun persona a tuma e iniciativa pa yega na formacion di un plataforma pa atende cu e herencia di sclavitud na Aruba. A sigui un periodo di exploracion di diferente forma di organisacion interno, combersacion y colaboracion cu entre otro: BZK, Cas di Cultura, y Archivo Nacional Aruba.
PNHSA a organisa cuater encuentro cu comunidad pa duna splicacion tocante e posibilidadnan di aplicacion pa fondo via BZK. Durante e encuentro, e presentenan por a haci pregunta, y bin cu nan mes ideanan y proyectonan.
Dia 2 di September 2024, PNHSA a wordo oficialmente estableci como fundacion, consistiendo di tres organisacion no-gubernamental y tres persona individual.
Den 2025, PNHSA a logra di topa cu prome minister Mike G. Eman y su team. Nan a introduci e directiva y a splica kico e metanan di PNHSA ta pa contribui na concientisacion di comunidad Arubano tocante respet pa e aspecto Afro-Arubano y e herencia di sclavitud na Aruba.
Cu sosten financiero di CEE Aruba, sponsornan, y un donacion singular di Comision di Conmemoracion, PNHSA a organisa eventonan den cuadro di conmemoracion di Abolicion di Sclavitud y celebracion di dia 1 di juli, honrando nos antepasadonan conoci y desconoci.
E eventonan tabata un presentacion di e tradicion oral, demostrando e raiznan Africano den arte di palabra: cantadór, tambu, rap, vocero, periodististico, poetate cu rap y hiphop — expresionnan di musica Afro-Surinameño. Tabatin actuacion di damanan di St. Martin y Aruba honrando e heroinanan di Resistencia, un marcha conmemorativo, dos poetanan local, actuacion Afro-Surinames cu dos talento di presentacion, un banda cu bon groove, y cuminda crioyo masha dushi mes.
E eventonan impactante a tuma lugar den Fort Zoutman y Scol di Arte, y a caba riba dia 1 di juli riba e plaza dilanti di Nicholaas Store.
Como directiva di PNHSA, nos kier expresa nan gratitud pa tur cooperacion y colaboracion exitoso, y pa e sosten cu nan a ricibi.
