Presidente Fundacion Chico Harms:
ORANJESTAD (AAN) – Chico Harms, Presidente du Fundacion Chico Harms, a hiba palabra durante e conferencia di prensa relaciona cu e actividadnan di Dia di Brazil.
Harms a gradici Fundacion Bernadina Growell cu a habri porta p’e dirigi algun palabra na prensa, den nan sede, en conexion cu 15 aña di existencia di Dia di Brazil.
El a splica cu Diadomingo awo, dia 6 di juli, Fundacion Chico Harms lo inicia nan prome actividad cu un parada acustico, cu trahenan folklorico pa conserva Aruba su folklore bibo.
E parada ta cuminza pa 3’or di atardi pabao di Misa di Brazil na Caya Bernadina Growell y ta termina na Centro di Bario Brazil, na unda, oficialmente, nan ta habri e exhibicion di trahe y artefactonan cu a wordo uza den paradanan anterior.
Pa 6’or di atardi tin inscripcion pa Cantica di Caya, y dia 25 y 26 lo tin e gran anochi tan spera cu ta e cantica di caya y tur hende ta pendiente riba dje, pa wak cual cantica lo dirigi e parada. Dia 29 y 30 di augustus tin eleccion di Reina.
“Nos eleccion di Reina Folklore 2025. Esaki ta un eleccion no solamente di beyeza pero di carisma, compromiso y dedicacion pa nos herencia y tradicion, na unda tur candidate participante mester haci un investigacion di tema, specificamente, y organiza den e tema aki cu e meta principal cu cada candidata por amplia mas nan conocemento, y presenta e resultado den un show. Den forma di canto, poesia, musica, baile, arte y palabra. Cada candidata mester trece dilanti un mensahe pa mustra Aruba, kico nan a siña durante e trayecto di nan investigacion y e tema cu nan a selecciona. Na final, nan mester comparti tur e sabiduria dilanti di un publico y Cuerpo di Hurado lo selecta e Reinanan cu lo carga, no solamente e titulo di Reina Folklore pero tambe e responsabilidad pa sigui promove tur aspecto mas, den sentido di nos tradicion ”, señor Chico Harms a duna di conoce.
