Solange Tchong, PR di AZV:
*Tambe lo yuda AZV tambe den su gastonan
ORANJESTAD (AAN) — Durante e Expo Salud y Bienestar, Solange Tchong, Relacionista Publico di AZV, a menciona cu e programanan nobo cu AZV ta bay financia banda di BOB, (ABO y BOCA), ta programanan cu a comproba nan eficiencia caba, den otro paisnan.
“ Pa loke ta cancer di pecho, esaki tabata comproba caba, loke ta deteccion di cancer di tripa tambe ta comproba. Bo ta wak cu ora bo tuma un grupo meta, di cierto edad cu ta core riesgo, un bez cu bo ta bay controla nan mas regularmente, bo ta ripara cu esaki ta logra salva bida. Door cu esaki ta comproba caba den otro paisnan, ta algo cu nos como AZV por sigui”, Solange a subraya.
Manera ta conoci AZV ta, inicialmente, pa cuido curativo, pero den e ley nan ta papia di prevencion secundario of terciario. “Den e caso aki t’asina cu motibonan pa cual a bisa cu nos por bay amplia e programanan di deteccion trempan, ta esnan cu ta comproba caba. Y esakinan ta programanan comproba y esey a haci cu pa AZV ta hopi mas facil, nos por evalua mas lihe y bisa ‘hey ban pa esaki’. E t’asina tambe cu, eigenlijk, si tabata pa AZV, pa Aruba lo tabata miho si nos por a inicia esaki mas trempan. Pero te cu awe, no a logra pa diferente motibo. Pues, aworaki si, nos tin tur stakeholders cu nos.
Otro punto importante tabata e experiencia cu nos tin cu Stichting BOB Aruba caba, cu nan ta haciendo esaki pa entre 6 pa 7 aña caba, y nos ta wak cu tin resultadonan positivo. Nos a logra di e forma aki detecta na tempo pa algun cliente, pero tambe, importante ta cu ya caba tin un grupo cu ta draai den e programa aki, pues pa futuro e ta hopi, hop bin mes!”, Solange a señala y bisa cu esaki ta e motibonan cu a scoge e dos programa menciona. Naturalmente, na final di dia, den futuro cu esaki ta bay yuda tambe den e gastonan di AZV.
“Pakico? Pasobra e ta mas facil ora nos ta ofrece e cliente un tratamento menos invasive, compara cu tratamentonan complica ora bo wordo detecta den un fase kizas hopi mas laat. Esaki no ta kita afo cu esaki ta exclusivamente pa grupo meta, cierto categoria di persona, of personanan cu riesgo halto, sinembargo nos ta mira cu esaki ta bay yuda Aruba enormemente”, Solange Tchong, PR di AZV a duna di conoce.
