Jalken Antonia di di Stichting JA IK Aruba:
ORANJESTAD (AAN): Fundador di Stichting JA IK Aruba, señor Jalken Antonia, a splica den un entrevista cu DIARIO, di e cambionan positivo cu el a nota den e hobennan desde cu nan a cuminsa participa den e programa JA IK te cu awor.
E prome cambio tabata cu e hobennan a cuminsa haci mas pregunta durante lesnan y bishitanan. El a menciona cu na principio, hopi di nan tabata keto, pero awor nan tin mas curashi pa puntra, te na e punto cu nan ta haci preguntanan fuerte y profundo.
Un otro cambio importante, segun señor Antonia, ta cu e hobennan a cuminsa comprende miho cierto concepto teoretico. Hunto cu esey, nan ta lesa bukinan di liderazgo y crecemento personal pa siña uza nan pensamento di un manera mas consciente y cambia nan mentalidad. “No bisa mi no por’, pa bo no mester cera e posibilidadnan di bo pensamento,” señor Antonia a expresa.
El a enfatisa cu e 40 hobennan cu ta participa den e programa ta sigui pusha nan mes y semper ta traha riba un ritmo di negoshi y desaroyo personal. Nan a bira mas creativo. Na cuminsamento, hopi di nan tabata tin miedo pa papia of expresa nan mes, pero e programa a empodera nan pa nan por para dilanti un grupo di hende y duna presentacion cu siguridad.
E programa tin un duracion di cinco luna. Meta principal di Fundacion JA IK ta pa haya mas fondo pa por sigui yuda mas hoben haya trabao, mirando e exito cu e programa ta obteniendo. Ya e otro luna, algun di e hobennan lo cuminsa stage, mientras cu otronan ya a logra haya trabao.
“Nos no a yega ainda, pero nos ta riba e bon caminda. Tin hobennan cu ya ta cla pa drenta e mercado laboral, pero tin otro cu ainda no ta cla pa cuminsa traha. Tur cos ta bay segun e ritmo cu nan mes ta sinti nan confortabel cu dje,” señor Antonia a remarca.
El a agrega cu fase dos di e programa lo enfoca mas riba habri mente di e hobennan, ofrece nan otro opcionnan y otro manera di pensa, cu cooperacion tambe di doñonan di negoshi.
Segun e, esaki ta un programa diferente, crea specificamente pa acerca y guia hobennan den un manera mas efectivo. Tres biaha pa siman tin lesnan durante e periodo di cinco luna. Sinembargo, señor Antonia a expresa cu e deseo ta pa sigui expande e programa y eventualmente hacie dura un aña completo, pa asina mas hoben por beneficia di e iniciativa aki, pero sigur tambe, nos pais tambe ta beneficia grandemente cu e cambio cu e programa ta produci.
