Segun docente na Universidad di Aruba, Thaïs Franken:
ORANJESTAD (AAN): Thaïs Franken, docente y Program Manager di Master’s in Governance & Leadership Program na Universidad di Aruba, a papia den un entrevista cu DIARIO tocante e programa MGL y e oportunidadnan cu esaki ta brinda na profesionalnan na Aruba.
E programa MGL a cuminsa na 2023 y ta un continuacion di e bacheloropleiding Organization, Governance and Management, OGM, cu a cuminsa na 2009 como parti di Faculty of Arts and Science. Esaki ta un facultad multidisciplinario cu ta ofrece diferente estudio.
Despues di e exito di e bacheloropleiding OGM, Universidad di Aruba a nota cu hopi exalumno tambe tabata buscando un siguiente paso. Hopi di nan cu ya ta traha na Aruba no por laga nan hogar pa bay Hulanda pa sigui un maestria. P’esey, tabatin demanda pa brinda un masteropleiding na Aruba mes, den e area di Public Administration and Organizational Science.
Na 2023, Universidad di Aruba a cuminsa oficialmente cu e prome cohort di e masteropleiding. Recientemente a cuminsa un cohort nobo cu alrededor di 35 studiante.
Segun Franken, e grupo di studiante ta consisti tanto di profesional cu ya ta traha como di esnan cu recientemente a finalisa nan bacheloropleiding. E edadnan ta varia di aproximadamente 23 pa 55 aña. Un aspecto importante ta cu e masterprogramma ta wordo brinda parttime pa asina studiantenan por combina nan estudio cu trabao.
Franken a menciona cu Universidad a scoge pa haci e opleiding riba diasabra di 9:00 am pa 2:30 pm, pa hacie mas accesibel pa studiantenan cu ta traha durante siman.
E participantenan ta bin for di diferente sector, entre otro sector publico, departamento di Gobierno, sector bancario, companianan di seguro, sector priva, Environmental Science, WEB/Elmar y diferente fundacion como tambe di esnan den enseñansa.
E masterprogramma tin un duracion di dos aña. Durante un parti grandi di e programa, studiantenan ta sigui diferente vak, mientras cu e fase final ta concentra riba preparacion di un tesis academico. Tanto OGM como MGL ta na nivel WO.
Pa interesadonan cu tin un HBO-bachelor, pero cu no ta cumpli directamente cu tur rekisito di admision pa MGL, Universidad di Aruba a introduci e PMGL. Esaki ta un programa puente di un aña, den cual studiantenan ta sigui vaknan for di e OGM Bachelor Program. E meta ta pa nan refresca nan conocemento, construi un base solido y despues drenta MGL exitosamente.
PMGL a cuminsa na 2025 y, segun Franken, e prome ronda tabata sumamente exitoso. Un grupo di 20 studiante a completa e trayecto y 18 di nan a sigui directamente cu MGL. Universidad di Aruba a cuminsa cu un cohort nobo y PMGL lo sigui habri tur aña pa personanan cu tin un bachelor y cu ta interesa den e Master’s in Governance & Leadership Program.
