ORANJESTAD (AAN): Cindy Kelly di Asociacion Trabao pa Hubentud Aruba (ATHA) a reuni diaranson mainta cu Formador Evelyn Wever-Croes.
El a bisa cu nan tabata tin un bon reunion unda por a duna den corto tempo un bista di e trabaonan cu ATHA ta bin ta haci 35 aña caba, pero tambe riba e plannan cu tin pa cu e siguiente añanan cu ta na caminda.
A duna Formador informacion relaciona cu e proyectonan di ATHA pa hubentud di Aruba, pero principalmente e trabaonan cu ta bin ta haciendo y cu ta pendiente di nan miembronan cu ta forma parti di nan asociacion.
Kelly a agrega nan a topa cu diferente influencia relaciona cu e pandemia cu a afecta e trabaonan cu ATHA ta realisa. Esaki no solamente riba e subsidio cu ATHA ta conta cu ne, pero tambe riba e trabaonan.
El a bisa cu mester a bira hopi creativo pa por realisa e trabao pero tambe e proyectonan ora cu ta atende directamente cu e hobennan.
Loke ta e parti social y emocional di e hobennan a wordo afecta hopi pa e pandemia aki y sigur esey ta e motibo grandi tambe pa por sigui traha sosteniendo e miembronan y e hubentud di Aruba, Cindy Kelly a declara.
E recomendacion cu ATHA a pone mas enfasis ora di combersa cu Formador ta e proyecto di mas nobo cu ATHA tin cual ta un programa despues di scol pa hobennan. Ta trata di un programa preventivo pa e hobennan pa loke ta e caminda cu nan ta scoge, a bisa.
Despues di scol e hoben tin espacio pa ta activo den un programa, guia bao di profesionalnan riba diferente area di desaroyo cu nan mester, pa asina tin e siguransa cu den e oranan cu nan mayornan ta ausente, nan ta bao di guia.
Esaki ATHA a pone como punto di atencion pa cu e hobennan riba e area di e formacion despues di scol.
Tambe a duna Formador informacion riba e proyectonan cu ATHA tin pendiente pa loke ta e parti preventivo, pero principalmente e sistema di sosten cu ATHA ta duna na e organisacionnan miembro, Kelly a finalisa bisando.
