ORANJESTAD (AAN): Loke a cuminza como e ultimo deseo di un señora, a comberti awo den un iniciativa mas amplio cu ta pidi atencion pa control di dolor y cuido paliativo na Aruba.
Recientemente Fundacion Ultimo Deseo Aruba (FUDA) a bin topa cu un situacion unda cu un pashent terminal tabata desea di pasa su ultimo dianan na cas, rondona door di su sernan keri. Durante e proceso aki, a bin realiza cu ainda tin hopi duda riba posibilidad di haya tratamento adecuado pa combati dolor pafo di Hospital.
Riba e potret por mira Renate Raven, president di Fundacion FUDA. El a splica cu a raiz di esaki, e profesionalnan envolvi den diferente disciplina a dicidi na uni forza. Mientras tanto, nan a forma un grupo di proyecto multidisciplinario consistiendo di representantenan di, entre otro, cuido di Docternan di Cas, atencion di Botica, cuido di Cas, cuido geriatrico, servicionan huridico, organizacionnan social, y iniciativanan di boluntarionan.
E grupo di proyecto aki mientras tanto a tene varios reunion y a bin constata cu ta existi un apoyo amplio pa sigui investiga e posibilidadnan di un tratamento humano di dolor y cu lo ta accesibel na cas.
E punto di salida di e grupo di proyecto ta simpel! E hendenan cu escoge pa pasa nan ultimo fase di bida na cas, mester por conta cu un atencion adecuado, comodo, cu dignidad y un control optimal di dolor.
Den e periodo venidero, nan lo bay pidi reunion cu diferente entidad y organizacion envolvi den atencion di cuido di salud na Aruba. Meta di esaki ta pa analiza hunto ki posibilidad ta existi pa mehora ainda mas e cuido di hendenan cu ta den nan etapa final di nan bida.
E grupo di proyecto ta subraya cu no ta trata di un debate riba casonan individual, sino un cuestion social cu, den algun momento, lo por afecta cualkier famia na Aruba.
Nan ta di opinion cu un sociedad ta caracteriza, parcialmente, pa e forma den cual ta trata e habitantenan mas vulnerabel. Precisamente den e ultimo etapa di bida, e hendenan aki merece di ta comodo, pasando esaki na forma digno, y e posibilidad (si nan desea esey) di ta na cas cu nan sernan keri.
Actualmente ta preparando e prome reunion cu e partidonan envolvi. E grupo di proyecto ta spera cu e colaboracion entre Gobierno, centronan di salud, profesionalnan di salud, y companianan di Aseguro lo permiti pa sigui desaroyo cuidonan paliativo y e tratamento di dolor na Aruba.
