Diantha Nüesch, PR & Marketing di Stichting BOB Aruba (BOB) -- ORANJESTAD (AAN): Stichting BOB Aruba (Stichting Bevolkingsonderzoek Borstkanker Aruba) tambe a pasa den un proceso diferente ora cu e pandemia di Covid-19 a inicia.
Diantha Nüesch, PR & Marketing di BOB, a duna di conoce cu prome cu e pandemia nan tabata genera un lista di invitacion (cu ta cay den e grupo di edad di 45 pa 75 aña) for di un lista cu nan ta haya for di AZV.
Asina tabata genera citanan automaticamente pa e clientenan y tabata post e cartanan di invitacion cu un fecha y orario di e cita. Pa asina e clientenan por a haya e carta na cas.
Segun Nüesch, e proceso aki tabata facil, pero tabata tin cosnan fastioso cu ne manera cu no tabata sa si e carta a yega na tempo of si e señora ta disponibel.
Ora cu e pandemia a cuminsa BOB no tabata tin un idea di cuanto cliente lo acudi na nan cita. Na e momento ey a dicidi di cambia e sistema y a stop di manda carta cu cita, segun Diantha Nüesch.
Aworaki, pa medio di e carta, ta pidi e clientenan pa nan mes tuma contacto cu BOB pa traha un cita. Esnan cu nan dos aña a pasa y cu sa cu ta tempo pa un chekeo por yama pa haci un cita nobo. E clientenan cu BOB tin den nan sistema caba, BOB tin nan number di telefon y ta pasa door di e listanan y ta yama nan pa un cita y pa percura cu tur hende tin un cita confirma.
Awor pa medio di telefon, por tin e confirmacion y sa cuanto hende lo acudi locual ta bon pa e protocol di higiena y di aglomeracion. Esaki ta algo cu ta bayendo hopi bon, e vocero di e fundacion a indica.
Pa esnan cu BOB no tin nan datonan pa por contact nan ta manda atrobe, un carta cu ta un invitacion habri, unda ta splica di e iniciativa y con por traha cita. Ta menciona e number di telefon di e oficina, un number di WhatsApp unda por manda un mensahe. Banda di esaki tin un website nobo tambe aworaki unda por bay riba un 'registration form' of por manda un email na nan email adres, a señala.
Tambe tin un QR Code riba e carta y ta masha facil cu pa medio di e telefon por scan e code y nan ta bay automaticamente riba e 'registration page' di e website.
Esey ta e proyecto cu Stichting BOB a cuminsa aworaki cu carta y toch riba un otro manera, poniendo e enfoke pa e cliente mes tuma contacto cu e fundacion, pasobra nan no tin e number di telefon di tur hende, Diantha Nüesch a splica.
E proceso ta bayendo bon y e respuesta cu ta hayando ta cu e clientenan ta yama pa 'book' un cita, specialmente esnan cu a caba di cumpli 45 aña. "E bon di esaki ta cu nos por puntra si ta prome biaha si of no y di biaha splica un tiki di e proceso pa nan bin prepara".
Corda cu si bo ta un hende muher entre 45 y 75 aña bo por participa den e 'screening' di pecho, cu bo carchi valido di AZV.
