Segun Frans Ponson, Presidente di CUA:
ORANJESTAD (AAN)-- Segun Frans Ponson, presidente di e organizacion “Comerciantenan Uni di Aruba,” (CUA), e negociantenan cu ta bende auto no por cumpra ni bende vehiculonan, pasobra no tin number, y e proceso di pago tambe ta trece dolor di cabes pa nan.
El a bisa cu CUA por a compronde si ta algo di un par di dia, pero no cu tanto luna a pasa cu esaki ta “going on” cu no por cumpra auto pasobra no tin number, e ta un poco absurdo.
El a comenta cu no ta solamente asunto di number sino tur e complicacion cu tin rond di esaki. El a splica cu paga e number di auto ta un proceso simpel manera bay riba bo cuenta di banco, bo ta scoge departamento di impuesto, eyden bo ta skirbi bo number di auto, pos ehempel, si bo tin e number 1000, pues A-1000, bo persons number, y bo ta cla caba, bo a paga DIMP.
Pero no! Awo bo tin cu bay riba e website di DIMP, aunke bo a pag’e caba. Riba e website bo tin cu habri e payment y tin cuater stap pa cuminza, no uno. Y den un bo ta bolbe hinca bo datonan y e prueba cu bo a pag’e; den e mesun compania cu bo a paga caba.
Ponson a señala cu ora bo a manda tur esaki, bo no ta cla tampoco. “Bo tin cu warda te dia cu nan manda bo un bewijs. Shonnan, nos ta aña 2026, y e ora ey gobierno kier papia di sector priva”, Frans Ponson a vocifera.
El a sigui cu e tema di auto. Awo mester bay keur e auto na DTI, un lugar naci na Aruba pa keur tur auto akinan. “Imposibel, nos sa caba cu esey no por! Mas di 50% di auto na Aruba ta getint. Na DTI bo tin cu kita bo tint pa bo keur e auto. Anto ora bo caba di keur bo auto bo tin cu getint’e bek. Polis ta para bo, e no ta duna bo boet, pasobra no tin un ley. Nos sa e topico aki. E ta un topico di mas di 20 aña caba t’asina aki. Pero pakico nos no ta fix e problemanan aki?
Envez di laga tur garashi na Aruba por keur un auto, anto e departamento di DTI, e par di hendenan ey duna companianan local trabao, ta algo masha simpel, e ora y ban controla ken a paga. Nos ta haci manera Polis no tin trabao pa haci. Polis ta cuida e pais, ta duna nos seguridad di e pais, di e pueblo, turismo. Enbes di polis, cu mi ta sigur tin nan propio trabao, nan tin cu para nos auto anto puntra bo puntra bo, ‘hey, bo a paga e numberplaats? Bo seguro ta paga?”
