Señora Kathy Ruiz-Paskel, Directora di Dimas:
ORANJESTAD (AAN): Directora di Dimas, señora Kathy Ruiz-Paskel, a duna aclaracion tocante e proceso pa stranheronan obtene nan AZV na momento cu nan ta ricibi nan prome permiso di residencia. Den un entrevista cu DIARIO, señora Ruiz-Paskel a splica cu, segun e procedura normal, e persona mester registra prome na Censo como residente. Hunto cu e permiso di residencia, ta duna nan e posibilidad pa bira usuario di AZV.
Señora Ruiz-Paskel a añadi cu DIMAS ta tene diferente combersacionnan cu e departamentonan concerni pa mira con e procedemento por optimalisa. Entre otro, Dienst Besmettelijke Ziekten (DBZ), cu ta e departamento encarga di e testnan medico y Censo, na unda cu hunto cu Dimas ta evalua e impacto cu e cantidad di prome peticionnan tin riba su organisacion, tumando na cuenta cu e registro di un number grandi di persona pa prome biaha, ta representa un impacto considerabel.
Segun e directora di DIMAS, no tin un termino specifico den cua un persona mester registra na Censo; sin embargo, si un persona ta residente na Aruba pa mas di 180 dia calendario y e tin su permiso di residencia, e tin tambe e deber pa registra como residente. Despues di esaki, e por sigui cu su registro pa haya AZV.
