Segun Misha Raymond:
ORANJESTAD (AAN): Segun señora Misha Raymond, representante di Respaldo, den un entrevista cu DIARIO a expresa cu e topico di salud mental no ta un topico facil pa papia di dje abiertamente, pero ta necesario mirando e desaroyonan cu tin actualmente.
Segun Raymond, social media tin un rol hopi grandi den e problema aki cu hopi di nos muchanan y hobennan ta enfrentando. Social media ta expone e ideanan, sentimentonan y pensamentonan relaciona cu suicidio. “Como hoben, si bo mira cu otro hoben a haci algo asina, e idea por bira mas facil pa pensa cu esey ta e unico manera pa sigui”, Raymond a expresa.
Pafor di esey, señora Raymond a enfatisa cu nos no mester lubida e efecto di COVID-19, y e sentimento di angustia y e sentimento di depresion cu a sali for di dje.
Tin tambe e desaroyonan mundial cu ta afecta hobennan, e situacion financiero, e situacion na cas y e desaroyo social y emocional. Con un mucha ta desaroya emocionalmente tin un efecto grandi riba con e lo para den bida y atende cu stress y cu situacionnan cu ta hacie sinti insigur.
Segun Raymond, awo mas cu nunca e desaroyo social y emocional di un mucha mester haya mas atencion. Antes, un mucha of hoben, tabata haya un coreccion of reaccion mas fuerte di un mayor ora su comportacion no tabata adecuado. Cu tempo y cu investigacion, nos a realisa cu kisas esey tabata un manera pa educa un mucha pa e por para mas fuerte den bida.
“Pero, e berdad ta cu nos mester busca un balance entre cria un mucha fuerte y cria un mucha cu ta emocionalmente stabil y cu ta independiente y ta funciona den sociedad, sin cu e ta cay den un estado emocional cu ta fragil of instabil”, Raymond a expresa.
Segun e, awendia stress ta afecta hobennan mas pisa compara cu antes. Social media tin un rol den esaki, na unda por wak e reaccion of efecto di cierto comportacion. E discusion no ta solamente tocante social media; e ta tocante loke social media ta haci cu e desaroyo di nos comportacion y di nos estado emocional.
“Nos ta mas consciente di e factornan cu ta afecta hobennan y cu por causa cu nan ta sinti nan mes menos capacita pa atende cu cierto stress den bida. Pero nan ta compara nan mes hopi mas awendia pa tur loke social media ta exponiendo nan na dje awe. Mi ta kere cu tin mas factor. E problema ta multifactorial na kico ta hiba nos muchanan y hobennan awendia pa tin e tipo di pensamentonan aki mas lihe”, señora Misha Raymond a expresa.
