Minister Arthur Dowers:
- “Muchanan no a nace ni crece riba nan mes”
ORANJESTAD (AAN): “E problema di hoben, no ta un problema specifico di hoben. E problema di hoben ta un problema di mayor y comunidad. Pasobra niun mucha ta nace riba nan mes y niun ta crece riba nan mes”, asina Minister Arthur Dowers a enfatisa den un entrevista cu DIARIO.
El a comenta cu hopi hoben cu ta haya un bon educacion, ta cay den e bon caminda pero toch algun ta cay den mal caminda. Hopi di esnan cu a haya un mal educacion, tambe ta keda den un caminda cu toch ta acceptabel y hopi ta cay den mal caminda dependiendo di nan sistema. Segun e, e ultimo aki ta trata mas bien di hobennan cu ta wordo poni bou presion, nan ta wordo maltrata y neglisha.
“Tur esaki ta pone nan bay den e caminda robes of ta bira victima di personanan cu tin maldad y malicia y ta influencia e hobennan pa bay riba e mal caminda”, Minister Dowers a comenta.
E minister a remarca mester trata e problema aki di hobennan aki den conhunto. No por acerca e problema di hoben for di perspeciva di hoben. E problema mester wordo acerca for di e perspectiva di comunidad y di mayornan. El a enfatisa cu mayornan mester asumi nan responsabilidad.
“Hopi biaha nos ta tende discusionnan cu mester actua contra mayornan cu tin yiunan cu ta causa problema den comunidad. Mi ta kere tambe cu esaki ta algo hopi necesario. Tin cierto casonan cu mester tene mayornan responsabel pa comportacion di nan yiunan hoben”, el a bisa.
El a agrega cu tin mucha bou di 10 aña ta riba caya den madruga mientras mayornan ta sali fiesta. Esaki ta crea oportunidad pa cosnan bay fout y e menornan aki ta haya nan mes den gara di malicia.
“Ora cos bay fout, nos no por culpa e mucha sino esnan cu a trece nan na mundo y a pone nan den e situacion aki”, el a expresa.
Minister Dowers a remarca cu den nos sistema Gobierno tin e responsabilidad pasobra mester proteha derecho di mucha, sinembargo, el a enfatisa cu mester hiba un discusion amplio den comunidad di ken tur ta carga e responsabilidad pa e dolor cu e muchanan aki ta carga.
“Hopi di e hobennan aki ta kere cu nan ta tough y nan kier ta gangster, incluso muchanan cu a haya miho educacion,” e titular di husticia a comenta.
Minister Dowers ta recomenda pa mayornan keda tira bista di loke nan yiunan ta publica riba medianan social. Tira bista si nan ta menaza hende y falta respet pa hende. Esaki hopi biaha ta wak hasta den hende grandi cu ta un mal ehempel pa muchanan.
Na final Minister Dowers ta expresa: “Ban tene discusion habri y stop di busca ken mester culpa y haci politica cu esaki. Mayornan prome cu tur mester tuma nan responsabilidad di nan yiunan y hunto cu comunidad y Gobierno, mester traha hunto pa evita cu nos hobennan cay den mal caminda”.
