College Aruba financieel toezicht (CAft):
ORANJESTAD (AAN): CAft, Het College Aruba financieel toezicht ta na Aruba un biaha mas y durante un conferencia di prensa nan a trece dilanti cu Economia di Aruba ta creciendo bon, mientras cu Finanzas publico tambe ta mustra un panorama positivo. “Ta importante pa Aruba uza e posicion financiero actual pa pone finanzas publico structuralmente na ordo y haci cu economia bira mas resiliente”, presidente di e Colegio di Supervision Lidewijde Ongering a indica.
El a sigui bisa cu un maneho presupuestario prudente ta sigui ta mas importante cu nunca, teniendo cuenta cu e gastonan halto di interes. Reforma structural den seguridad social y riba mercado laboral ta percura pamas resiliencia.
“A adopta e presupuesto pa 2024 na tempo y e esaki ta cumpli ampliamente cu e normanan central
presupuestario di un surplus di por lo menos 1 porciento di e producto interno bruto (PIB), tanto pa
2024 como pa e periodo pluri-annual”. Sinembargo tin riesgo tambe. E gastonan di interes, cu ya ta
representa casi 20% di e presupuesto, por aumenta mas ainda door di e refinanciamento den
e añanan nos dilanti, segun e presidente di CAft.
Ongering a sigui bisa cu esaki por haci cu nan ta desplaza mas cu nunca otro gasto of inversion.
Pesey pago di debe ta keda importante.
El a sigui menciona cu inversion ta necesario pa haci economia mas resiliente y pa aumenta capacidad pa genera entrada.
Den e contexto aki CAft ta positivo tocante e aumento di e presupuesto pa inversion planea na un suma di
AWG 115 miyon na 2028.
Pa garantiza e eficacia di e inversionnan aki, ta importante pa traha un agenda di inversion pluri-anual cu ta conecta na e metanan di maneho incluyendo esunnan di Pakete di medida
“Cu e espacio presupuestario disponibel tanto na pais como na e fondonan social, esaki ta e momento pa
implementa reforma necesario pa fortalece e economia”. Den salubridad ta tumando paso pa yega na
controla gasto structuralmente. En principio CAft ta positivo relaciona cu un marco di gasto como
instrumento pa controla, basta cu esaki yuda frena e gastonan di cuido realmente.
Encuanto seguridad social, hustamente awo cu e posicion di salida di e fondonan ta favorable, lo ta bon
pa Aruba pensa riba reforma cu ta yuda e mercado laboral bira mas dinamico, segun Ongering.
E presidente a bisa tambe cu e luho cu Aruba tin awo
ta cu e por aplica reforma sin mester tin aumento di carga.
Riba tereno fiscal Aruba a dal e prome paso caba pa haci e sistema fiscal mas robusto. E sistema di
belasting indirecto sinembargo ta keda fragmenta y door di esaki innecesariamente compleho. Ta
recomenda un sistema simpel den forma di un impuesto riba balor añadi (belasting op toegevoegde
waarde – btw) cu lo mehora cumplimento.
