Despues cu Parlamento aproba e Ley di Proteccion na Consumidor:
ORANJESTAD (AAN)—Presidente di Directiva di Aruba Fair Trade Authority (AFTA), señor Roly Sint Jago, a duna di conoce den conferencia di prensa, cu entrante 1 di Januari 2025, probablemente AFTA lo tin e tarea tambe di produci e Derechonan di Consumidor, y e ora ey e asunto ta bira un poco diferente.
Esaki den sentido cu si na cierto momento, supermercadonan actua contra e interes di e consumidor, colectivamente, AFTA lo tin un tarea di señala esey y haci investigacion di wak kico por haci riba e punto ey.
“Na e momentonan aki Derechonan di Consumidor no ta cay bao di AFTA, pero speranza ta cu ora e Proyecto di Ley di Proteccion di Consumidor pasa na Parlamento y bira Ley, e perspectiva ta cu probablemente esey ta e aña aki ainda, anto entrante Januari 2025 e aspecto di interes colectivo di consumidor lo cay bao di supervision di AFTA tambe”, señor Sint Jago a reitera.
Sint Jago a menciona tambe cu como AFTA nan a bira funcional dia 1 di December y nan ta orienta nan mes riba competencia husto. Ora di papia di corupcion, el a aclarea cu no ta riba nan tereno investiga gobierno pa corupcion. El a reitera un biaha mas cu nan ta orienta nan mes riba competencia entre empresanan comercial.
