Costa Arubano y luganan vulnerabel mester wordo proteha --- *Despues di COHO mester forma grupo di trabou cu Hulanda
ORANJESTAD (AAN) — “E problemanan financiero di Aruba ta deshaci di uno di e realidadnan mas importante cu mester di atencion di e pais. E problemanan serio cu cambio di clima ta encera pa Aruba, ta wordo lubida. Es mas, Aruba a inverti den situacionnan peligroso.”
Na palabra un experto sumamente preocupa pa e concepto cu un parti grandi di Aruba tin riba e peligernan di cambio di clima.
El a hasta insisti cu na momento cu Gobierno di Aruba termina negociacionnan di COHO, hunto cu Hulanda mester crea un entidad cu directamente ta cuminsa traha riba e realidad di futuro den cual condicionnan di clima por destrui loke awor ta prioridad den gastamente di placa na Aruba.
“Ora papia di Aruba ta papia di un isla chikito, rondona pa lama, cu tin como atraccion turistico hustamente peligronan mas grandi di e cambio di clima,” ta bini dilanti.
Pa contempla e resultadonan mas grandi di cambio di clima na Aruba, mester bay costa Zuid di Aruba, cu ta uno di e atraccionnan turistico mas grandi di e pais.
Beachnan grandi di santo cu ta sumamente bunita sigur den e solo briyante di un clima tropical.
E beachnan no tin proteccion natural di por ehempel barancanan halto.
E nivel di e lama di Aruba lo subi y poco poco e beachnan lo perde espacio cu mester entrega na lama.
Kico esaki ta nifica pa e pais? Kico e lo nifica pa economia di e pais, cu ta depende di turismo cu mester wordo acomoda den cercania imediato di e lama, cu lo subi?
“Aruba a gasta sumanan enorme den construccion di careteranan cu lo bira sumamente peligroso atrabez di tempo,” un experto a indica.
El a mustra cu no a tene cuenta cu e cambio di clima cu lo provoca situacionnan di tempo cu publico no por haci uzo di e careteranan mas.
“Cambio di clima no ta algo pa futuro. Cambio di clima ta presenta su mes tambe na Aruba cu calor enorme, cu lama cu ta bira mas cayente, cu lama cu ta crece mientras ceronan di ijs na Polo Norte y Polo Sur ta bira awa cu ta yuda subi nivel di lama,” a wordo indica.
Cambio di clima ta un hecho den un mundo cu no kier atende cu su peliger mas grandi.
“Cuanto placa Aruba a gasta den e careteranan grandi,” tabata un pregunta. Otro pregunta tabata kico ta pasa ora tin yobida pisa cu actividad di e Zona di Convergencia Intertropical, por causa.
Aruba practicamente ta paralisa na momento cu e mester biaha na tera ya cu e situacionnan di tempo lo haci imposibel pa hasta uza helicopter y sigur hende no por subi lama.
Sumamente preocupante ta tambe e forma con construccion ta sigui na lugarnan peligroso, cu pa tradicion ta keda inunda den yobidanan.
“Aruba ta yena cu edicionnan enorme na e sitionan mas costoso. Na mes momento no ta tene cuenta cu naturalesa,” informantenan a indica.
DIARIO a base di e informacionnan cu el a ricibi a cuminsa indaga den realidadnan importante pa Aruba riba tereno di clima.
E prome reaccion concreto pues tabata cu Aruba, na momento cu yega na un acuerdo cu Hulanda pa COHO y resto di e Acuerdo entre e dos paisnan, yega na un cooperacion cu Hulanda riba tereno di proteccion contra cambio di clima.
A wordo indica cu Hulanda ta reconoci rond mundo pa e proyectonan cu e pais a realisa pa proteha su mes contra peliger di naturalesa.
Riba tereno di urbanisacion sigur mester di Hulanda pa guia Aruba segun expertonan cu ta preocupa cu e forma cu construccion avansa na Aruba durante ultimo decada.
