Diego de Cuba, Presidente STA:
ORANJESTAD (AAN)- Diego de Cuba, Presidente di Sindicato di Trahadornan di Aruba (STA), den un entrevista cu DIARIO a menciona cu mayoria di su miembronan (Ambtenaarnan vooral), y tambe Gobierno, ta na haltura cu e prima di pensioen a subi 3.25%.
De Cuba a bisa cu hecho ta keda cu e prima di pensioen lo subi pa Januari 2024 cu 0.3% y esaki lo nifica tambe un gasto extra pa Gobierno di Aruba, y pa esnan cu tin trahadornan cu ta cay bao di APFA.
“Nos ta spera cu e no ta bay tin consecuencia pa e clase trahado, pero solamente pa e dunadornan di trabao. Den un carta cu nos a manda pa señora Van Veen, nos a pidi aclaracion riba e situacion aki, mirando e hecho cu nan por haci’e conforme nan statutonan, door di e reglamentonan cu tin riba mesa nan por haci’e pero mester tene cuenta cu e trend aki, pasobra por bisa cu e prima ta bay subi 0.3% pa 2024, pero pa 2025 y e añanan cu ta sigui su tras? Tambe e por tin consecuencia pa e doñonan di trabao y e empleadonan publico?” Diego de Cuba ta cuestiona.
Pues, esaki ta un motibo di preocupacion y STA ta kere cu mayoria di e sindicatonan aworaki ta na haltura di esaki tambe, y ta un pregunta valido tambe pa haci na Gobierno di Aruba con ta bay atende cu e asunto aki? segun Diego de Cuba.
