SANTO DOMINGO: E mercado mundial di combustible ta sigui primi cartera y pone varios Gobierno hala faha mara.
Actualmente e prijs di LNG Gas (gas natural) ta na nivelnan exorbitante, y segun Vice-Ministro di Comercio Interno na Republica Dominicana, Ramon Perez Fermin, e topico ta complica, pero Gobierno di e pais observando e situacion mundial critico di prijs di gas (causa pa guera Rusia y Ucrania), a pone awor riba agenda prioritario pa sigui explora e mihor posibilidadnan cu “solucionnan razonablemente satisfactorio”.
Republica Dominicana tin capacidad di warda como 1 luna di stock di LNG Gas, pero e mercado mundial cu ta cambiando a pone nan ta cuminza planifica e mercado den futuro. El a corda con na 2021 tempo tabatin problema na Texas, y awor cu Horcan Fiona, no tabatin problema di keda sin stock na e pais di merengue.
Tin di corda cu Gobierno Dominicano ta sigui duna subsidio pa mantene prijs abao. Varios organizacion internacional a pone balor grandi na e decision Dominicano pa subsidia prijs di gasolin, diesel, y LNG Gas como un modelo pa otro paisnan.
Apenas siman pasa, Gobierno Dominicano a bolbe duna OK pa subsidio di 600 miyon Pesos Dominicano pa asina prijs di Gasolin y Diesel no subi na e pais.
“Gobierno a tuma medidanan na momentonan preciso. El a cuminza subsidia na e momento adecuado, y awor ta convenci cu esaki ta loke a contribui na e recuperacion rapido di economia Dominicano, y trece impacto positivo pa atrae mas inversion di exterior.
Pesey awor Republica Dominicana a ocupa e prome lugar pa atrae mas inversion stranhero den henter region Caribense. Enberdad e guera causa pa Rusia a kibra e harmonia di prijs, y pesey paisnan na Europa cu diripiente no ta haya gas natural mas di Rusia, a cuminza busca productonan equivalente y pesey prijs di combustible (Gasolin, Diesel, LNG Gas) a subi asina.
Aworaki tin mesun demanda pa crudo, pero un aumento di demanda di productonan finaliza, y esey ta splica cu apesar cu na 2008 cu un crisis di combustible y un crudo di WTI na 150 Dollar pa bari, toch gasolin tabata mas barata cu awor.
Awendia, aunke prijs pa bari no a ni pasa 83 Dollar pa bari, tog prijs di gasolin y diesel ta mas caro compara cu tempo cu crudo tabata na 150 Dollar. Esaki ta debi cu tin demanda grandi riba gasolin y diesel.
Pesey mes, Gobierno Dominicano no ta mira e subsidio riba gasolin y diesel como “un gasto”, pero mas bien ta mire como “un inversion” y e prueba di tur esey ta e stabilidad di economia, e competitividad y e paz social.
