Tras di caos cu tarifanan di importacion ta lubida Conferencia Clima 2020
- E bataya camufla pa fortunanan di poznan di azeta na Ukraine y Gaza
- Plastic produci pa azeta cu lugar central den comercio entre Merca y Asia
ORANJESTAD (AAN) Na 2020 un conferencia sumamenrte importante mester a tuma lugar na Glasgow na Escocia.
Mundo henter mester a reuni, pa dicidi con hende ta bay defende su mes contra e peligro grandi di cambio di clima durante un Conferencia cu mester a produci un decision mundial cu lo mester a produci e momento cu hende na 2050 a reemplaza un gran parti di uzo di petroleo den industria y su bida diario.
Cu e conferencia lo a topa cu problema ya a bira evidente prome cu e conferencia a cuminsa na 2020 ora Covid-19 a pone hende na careda y a paraliza economia mundial.
Na final na 2021 e Conferencia di Clima a haya continuacion na Glasgow y a wordo dicidi cu mundo na un forma programa lo a deshaci di uzo di petroleo y cu na 2050 ya hende lo a percura pa reemplaza petroleo pa un gran parti.
DIARIO den su observacionnan tabata sumamente realistico y a cuestiona loke lo a pasa cu economia mundial na caminda pa 2050, cu practicamente no ta wordo menciona mas den discusionnan mientras hasta e conferencianan di clima, a perde atencion.
Na 2025, e realidad ta rementa den cara di hende cu silenciosamente a duna continuacion na crecemento economico a base di petroleo, aunke cu mas atencion pa deshaci di e partinan mas peligroso di petroleo, cu no ta solamente gasolin pa auto.
Petroleo ta base di un gran parti di industria y comercio mundial, manera sigur e continente Aziatico ta duna prueba.Na 2023, China tabata produci 33 porciento di tur obheto di plastic na mundo, mientras resto di Asia tabata produci 19 porciento y region Mericano 17 porciento.
Productonan Asiatico a bira popular rond mundo pa nan prijs mas abou den cual uzo di plastic sigur a hunga un papel.
Actualmente ta mas dificil pensa cu un dia mundo lo bandona plastic pero tambe uzo di petroleo, ya cu ta keda demostra cu ta petroleo te awe ta domina mundo, manera den tur conflicto ta bini dilanti.
Dos punto importante cu tin mundo hasta den gara di miedo pa un guera oficialmente mundial, ta Ukraine y e teritorio di Gaza na Israel, cu sin cu mundo ta na haltura ta dos pais cu un fortuna na petroleo.
Estudionan oficial cu a wordo haci na Gaza ta papia di Miyones den e suelo di e pais, caminda hende ta muri di hamber pa motibo di guera pa e teritorio di Gaza, cu un fortuna enorme bou fondo di laman.
E congreso di petroleo na 2021 a haya basta atencion despues cu el a wordo pospone dor di Covid-19 pero a perde tur atencion den e forma cu mundo rapidamente a sigui cu su uzo di petroleo te awe, cu petroleo ta ocasiona e problema grandi cu a bira introduccion di tarifanan dor di Gobierno Americano den intento cu mester tabata basa segun prome informacionnan riba un estorbo pa mas importacion di producto y asina proteccion di e companianan cu produccion na Merca.
Na mes momento Merca kier di su parti un situacion den cual e ta ricibi algo pa e cooperacion enorme cu e ta duna na proteccion di teritorionan cu ta wordo amenaza rond mundo y a cuminsa papia di prijsnan preferencial di petroleo, mientras realmente Merca mes ta e pais productor mas grandi di petroleo na mundo.
E problema serio di mundo ta, cu den transcurso di tempo, mundialmente tabata tin cambio en poblacionnan loke ta haci cu na diferente lugar na mundo, ta wordo cuestiona kende tin derecho riba cual tereno.
Mientrastanto e presencia di petroleo den suelo na tera of laman, ta causante di guera, pero tambe di situacionnan cu ta afecta prijs di petroleo rond mundo.
Ayera a yega e momnento cu prijs di petroleo cu na 2025 mester a alcansa 100 Dollar pa baril, na baha te den vecindario 60 dollar pa baril, loke atrobe ta bay causa problema pa mundo, cu ta perde su balansa economico.
Ayera na ciere di DIARIO, prijs di petroleo Mericano a baha bou 60 Dollar pa baril den situacion mundial sumamente dificil den cual Merca a impone tarifanan sumamente halto pa China pero tambe pa tur otro pais.
Un materia sumamente dificil riba tereno economico y financiero mundial, mester wordo bon splica na Pueblo di Aruba, cu ta biba di turismo, cu tambe ta un producto di importacion!
Na mes momento mester splica cu e caida di prijs por wordo sigui pa aumento den un situacion di turbulencia mundial, cu realmente a origina for di e momento cu a dicidi cu mester pone fin na petroleo!
