Ciudadano ta comenta: - ORANJESTAD (AAN) – Un ciudadano biba na Santa Cruz y cu ta traha na San Nicolas, a tuma contacto cu DIARIO pa duna su comentario tocante e prijs asina halto di gasoline.
E ta un persona cu tur traimerdia tin cu bin te Santa Cruz pa busca su muchanan na scol, anto di eynan come na cas y bolbe San Nicolas cerca e persona cu ta wak pa nan te ora e caba di traha.
Esaki ta nifica un gasto den gasolin di 80 pa 90 Florin pa siman! Tin biaha e ta haya stress ora e ta saca cuenta, pasobra te ainda e no ta hayando su salario normal, pero ainda e ta haya un porcentahe menos, cu ya caba ta haci peso den su presupuesto.
E ta mira cu hopi hende ta masha trankil, cu nan no ta cuida suficiente mas pa preveni covid-19, hasta nan ta bisti nan tapaboca, e ta ripara cu fiestanan den famia of cas di amistad a cuminza back, y ta conoci cu no tur hende ta vacuna cu e dos dosis caba.
E ciudadano aki ta un di e personanan cu no ta confia, y ta sigui su mes atene na e medidanan comosifuera cu nada a cambia, pasobra con cu bay bin e pandemia tey y su variantenan acerca, pero e ta spera no bin mas medida financiero di gobierno si, y cu por wak di ki manera por yuda pueblo, bahando un poco sikiera e costo di gasoline.
