LOS ANGELES: Prijs di gasolin a subi drasticamente den fin di siman na estado di California na Merca,
como reaccion pa e guera cu ta sigui escala entre Rusia y Ucrania, y cu asina ta sigui eherce presion riba inflacion halto cu tin rond mundo aworaki.
Na Los Angeles, por a mira prijs di Unleaded Premium na $7.55 pa galon. Unleaded Regular tabata na $6.95.
Algun gasoline station keto bay tabata ofrece prijs mas abao, y esaki a crea un rij largo di vehiculo cu a bay para eynan pa logra cumpra gasolin. Pasobra ya caba habitantenan di hopi ciudad na parti zuid di California a cuminza keha. Algun chauffeur a indica cu nan lo bay trata na limita e cantidad di biaha cu nan ta core auto den simannan venidero, pa asina spaar gasolin y principalmente evita di gasta asina hopi placa.
E aumento di prijs di gasolin ta spantando hopi consumidor tambe, kendenan awor ta pensa cu ta mihor nan cuminza check pa inverti den un auto electrico. Y esaki ta algo cu e guera nobo aki ta pone hopi doño di auto pensa mas y mas riba e posibilidad ey.
