E control di propiedad di Pueblo ta deber sagrado di Parlamento
*Benta di terenonan erfpacht a baha balor di propiedad nacional
*Balor di propiedad di Pueblo ta sostene base financiero di pais
ORANJESTAD(AAN)—Pa presenta rubricanan, DIARIO ta scucha Pueblo y ta presenta, hunto cu expertonan den nan materia, e contesta riba loke ta biba den Pueblo.
Ayera peticion a drenta pa duna informacion encuanto e hecho cu e partidonan den Gobierno durante e reunion pa trata Presupuesto di Aruba, lo a dedica atencion na e Caso Avestruz.
E contesta ta, manera DIARIO a splica na ocasionnan anterior, cu Parlamento for di 2013 tabata tin e deber di a haci loke awe Ministerio Publico ta haci y controla loke a pasa cu entre otro terenonan di Pueblo.
Terenonan di Pueblo ta propiedad di Pueblo y ta sostene e forsa di Pueblo ora debe mester wordo haci pa cumpli cu e exigencianan financiero di Gobierno.
Cuanto balor tereno propio tin pa ciudadanonan, ta conoci. Si un persona kier haci prestamo na un banco por ehempel, e mester duna prueba cu e tin placa pa debolbe e suma cu e ta presta.
Si banconan rond mundo, entrega placa na hende sin puntra con e placa ta bolbe den caha di banco, tur banco ta bay bankroet.
Na 2013, un situacion financiero sumamente importante a surgi pa Aruba, cu tabata aumenta su debe nacional na un forma nunca bisto. Aumenta e debe nacional a bira hasta un forma di gobernacion di un Gobierno cu a tuma riesgo grandi cu placa di Pueblo.
Ora bisa cu Hulanda a evita cu Aruba a bay failliet, esaki ta nifica cu Hulanda a pone placa riba mesa pa yuda Aruba financieramente.
Ora papia di bancarota, no ta papia solamente di e placa cu tin den caha, pero tambe di e balor di propiedad di Pueblo y sigur tereno.
Pues tereno tin un balor financiero pa Aruba. Tereno ta representa un balor na placa pa Aruba.
Den e caso Avestruz, e personanan cu lo a wordo privilegia segun acusacionnan dor di Benny Sevinger, a ricibi parti di propiedad cu balor di placa enorme.
Den e acusacionnan oficial por tuma nota cuanto Miyones y Miyones di
Florin lo a bira entrada pa e grupo privilegia di Benny Sevinger.
Kico esaki ta nifica, cu e balor di propiedad di Aruba a baha na momento cu e maneho financiero cu tabata wordo hiba dor di Gabinete Mike Eman, tabata produci debe.
Ora Gobierno tambe crea debe, e ta pone su propiedadnan cu ta propiedad di Pueblo tambe na peliger.
Parlamento di Aruba tin e derecho di Presupuesto. E tin e control riba e forma cu Aruba ta gasta placa, ta crea entrada pa e pais.
Esaki ta haci cu Parlamento tin e deber pa garantisa cu no solamente placa ta wordo usa na forma abusivo y hasta corupto pero tambe cu e propiedadnan di Aruba no ta wordo entrega na otro persona cu por haci ganashi bruto, cu ta bira perdida financiero pa Aruba.
Na e momento cu a trata presupuesto sin duda mester a bini dilanti, cuanto placa Aruba a perde, sin cu esaki a bini dilanti den reunionnan publico di Parlamento, pa medio di e forma cu a entrega terenonan cu balor grandi na amigonan cu a haci negoshi.
Si e acusacionnan di e Caso Avestruz ta berdad, placa cu mester a drenta caha di Aruba directamente pa benta di tereno di Aruba na forma cu Ley ta describi, a keda sin drenta y por ehempel huur di e terenonan aki riba termino largo, cu te awe por a produci placa pa Aruba a wordo aborta.
Benta di tereno valioso a bay pa otro loke a kibra e forma cu na forma transparente, cifranan di Aruba ta refleha perdida di tereno cu tin balor financiero pa Aruba.
E placa cu otro a gana cu negoshi cu tereno cu tabata di Aruba, ningun caminda ta bini dilanti den e cifranan oficial di e pais, di e Pueblo di Aruba, caminda Parlamento tin e control directo riba propiedad di Pueblo!
