Parlamentario Setty Christiaans-Yarzagaray:
ORANJESTAD (AAN) – Den conferencia di prensa di fraccion di MEP, parlamentario Setty Christiaans- Yarzagaray a elabora tocante e aprobacion di Presupuesto 2022, tanto di parti di fraccion di MEP como di coalicion, cual ta refleha un realidad nada bunita.
E parlamentario a bisa cu e presupuesto aki, logicamente, no ta balansa ainda, pero despues di e efectonan di un pandemia y un crisis asina grandi, Aruba y ningun otro pais no ta den nan miho momento.
Yarzagaray a indica cu, logicamente, como gobierno lo a desea pa tin un panorama hopi mas bunita presenta pa Aruba, pero den e caso aki na lugar di un historia bunita ta preferible pa conta e realidad, y esey ta locual e presupuesto aki a refleha tambe.
El a splica cu esaki no solamente den su aspecto cu entrada no a yega na e nivel di 2019 pero tampoco e gastonan no a yega na e nivel ey. Mirando e hecho cu tin cosnan cu gobierno a duna su palabra y mester cumpli cu nan. Tampoco e pais por keda sin desaroya y sin inverti, pasobra tur esaki ta necesario pa Aruba su economia. Na final di dia, e parti cu mas lo saca Aruba di e problemanan financiero cu e ta den dje, ta e desaroyo economico.
El a agrega cu tanten cu Aruba su economia no yega na e nivel cu e tabata anteriormente, ainda no por bisa cu Aruba ta den un stabilidad y no solamente pa gobierno sino cu e ta conta pa comercio y pa nos pueblo igual, pasobra na momento cu hopi a perde entrada nan sa e ora den nan cas, con gobierno ta sinti, no solamente cu a perde entrada sino cu a fia extra placa pa por sostene esaki. Lo yega momentonan, logicamente, hopi mas pisa mirando e hecho cu tin convenionan pa firma cu Hulanda; tin leynan na nivelnan di Reino tambe cu ta bay wordo trata pronto pa Parlamento y cu Parlamento di Aruba a ricibi y pasa door di nan caba. Asina Setty Christiaans-Yarzagaray a señala. El a agrega cu esakinan ta refleho di loke ta bay bin!
