Prome Minister Evelyn Wever-Croes:
*Lidernan a mustra nan solidaridad y a indica unda nan por yuda Haiti
ORANJESTAD (AAN): Un di e hopi conferencianan cu a tuma luga durante e siman di e reunionnan di Asamblea General di Nacionnan Uni #UNGA78 na New York tawata uno hopi conmovedor cu a wordo organisa pa Presidente di Canada, Justin Trudeau.
Presidente Trudeau a invita tur e lidernan den e region cu a participa den UNGA78 pa delibera riba e tema di Haiti.
Durante e conferencia, a wordo informa di e situacion caotico na Haiti. E pais ta wordo azota pa violencia treciendo hopi sufrimento den hopi hogar den e pais. Hopi mucha na Haiti no por bay scol y famianan ta wordo abusa. Segun esnan presente di Haiti, e situacion aki ta conoci internacionalmente pero niun hende ta poniendo suficiente atencion pa yuda e pais debidamente.
Prome Minister Evelyn Wever-Croes a remarca cu despues di a scucha tocante e situacion aki na Haiti, lidernan di diferente pais a mustra nan solidaridad y a lanta mesora pa indica unda nan por yuda Haiti. Presidente Chandrikapersad "Chan" Santokhi di Surinam tawata un di e promenan pa duna su compromiso na e Yamada di yudansa. Tambe Premier di Barbados, Mia Mottley, tawata mas critico den su remarkenan y a indica cu e situacionnan na Haiti ta rekeri mas cu solamente manda autoridadnan pa mantene paz y trankilidad.
“E tawata un hopi bon conferenia na unda cu nos a wordo informa di e situacion real na Haiti y nos oracion y deseo ta pa tur ciudadano na Haiti pronto sinti e trankilidad y resolucion di e conflictonan cu e pais ta confronta”, Prome Minister a enfatisa.
