ORANJESTAD (AAN) Den entrevista cu DIARIO, Presidente di e Organizacion di Pensionadonan Publico (OPPA), señor Ivo Valdes, a expresa cu e ta pidi e pensionadonan pa “vota bon”.
“Vota conciente, vota pa un Aruba cu ta bay den un bon direccion! Si puntra mi, kico mi kier pa e pensionadonan, holo! Mi kier hopi cos pa nos pensionadonan. Na prome lugar, mi kier pa nan haya un reconocemento total, manera nan merece, un miho cuido, un miho entrada, baha e gastonan di gobierno, pa por cubri tur e necesidadnan cu nos grandinan ta aden”, Valdes a señala.
El a agrega cu nos falta casnan di cuido; te ainda, tin lista di spera haltisimo. “E casnan di cuido ta caro! Nos tin e tendencia, y ta jammer pa bisa, cu un mama of un tata cu ta cuida su yiu durante añanan largo, anto ora e mama of e tata bira grandi, nan ta djis tir’e un banda. Anto, nan no kier cuid’e, e ta pasa trabao, tin hopi problema den e pais aki, ora ta trata nos grandinan”, Ivo Valdes a remarca.
Valdes a expresa cu tin biaha esnan jong ta lubida cu un dia nan tambe ta bira grandi y nan tambe kier un bon trato. “Dus, trata bo grandi y tur e grandinan bon pa mañan bo haya e mesun trato, cu bo a duna nan. Esey ta importante!” Ivo Valdes a señala.
Pa gobierno, Valdez a expresa, p’e haci loke OPPA ta pidie. Uno, ta baha gastonan di gobernacion. Algo cu ta molesti’e ta pakico un minister mester core den un auto di 150 mil florin. “Un auto di 50 mil por hibe na mesun caminda, toch? Si bo ta wak na otro camindanan, na Europa, nan no ta core den autonan asina caro. 2. Pakico un minister mester tin tanto consehero? Na Curacao tin mitad di hendenan cu nos tin ta traha den gobierno. Tur negoshi ta purba gana placa door di hisa eficiencia. Pero akinan no, y esey ta e problema cu nos tin. Ta p’esey mi ta pidi e votadornan pa vota conciente y exigi for di e proximo gobernantenan pa cumpli, locual nan a priminti den nan programa di gobernacion pasobra nos no por haya cada bez e mesun cosnan di semper. Ni ta spera cu esey lo tuma lugar” Valdes a señala.
