ORANJESTAD (AAN) E Presidente di e Federacion di Trahadornan di Aruba, mr. Hose Figaroa, den entrevista cu DIARIO entorno e Dia di Labor,
conmemora dia 1 di Mei, a señala cu esaki ta un dia hopi importante pa e clase trahado. Durante e entrevista aki el a pone hopi enfasis riba e importancia cu tin pa legislacion riba situacion na pia di trabao, tuma lugar.
Riba e fecha aki ta wordo recorda hechonan cu no ta bunita, y e fecha 1 di Mei a bin den un epoca unda cu hopi lider sindical a perde nan bida, den protesta pa logra, entre otro, e ocho oranan di trabao. Den e protestanan e tempo ey, a logra e ocho oranan di trabao pa dia, Den e protestanan e tempo ey, a logra e ocho oranan di trabao pa dia, cu ta e standard di oranan laboral awendia, y durante tempo el a sigui evoluciona y el a bira tambe un celebracion di e clase trahado.
“Tur economia ta depende di trahado. Bo por tin empresanan grandi, pero empresa riba su mes no ta genera placa. Bo mester trahado pa traha pa empresanan por genera placa.
“Pues pa nos esaki ta un dia hopi importante, pasobra e ta mishi cu nos, como trahado. Aki na Aruba mi no por bisa cu ta e peor situacion na mundo, pero tin lugarnan cu por bira miho pa cu derechonan di trahado, sigur cu si!” Presidente di FTA a señala.
Figaroa a declara cu pa loke ta tratadonan internacional, hasta convenionan di ILO cu ta regula seguridad na trabao, nos tin hopi aña cu ta papia di e idea di bin cu legislacion, pero esaki no ta sosode.
“FTA sigur ta kere cu esaki tin cu pasa. Nos ta compronde cu esaki no por pasa di un dia pa otro, pasobra ta cambionan grandi, pero nos mester cuminza por lo menos den un fase cu ta introduci esaki, como cu e ta sumamente importante pa e trahado tin seguridad tambe na pia di trabao”, mr. Hose Figaroa, presidente di FTA, a reitera.
Figaroa a señala cu hopi hende ta kere cu un trahado ta bin ta wordo bon paga, e ora ey e no tin mucho di reclama, pero esey no ta e caso.
“E por wordo bon paga, pero si su situacion na trabao no ta ideal, bo por haya bo cu diferente problema, por ehemplo di salud.
Algo hopi simpel, bo ta traha den un oficina pero e stoel den cual bo ta sinta no ta adecua, cu tempo e por hiba na problemanan fisico. Y aki na Aruba, por ehemplo, cu bo ta papia di un economia riba turismo, e ora ey bo ta pensa riba bartender, waiter, pero bo mester corda tambe di trahadornan di room attend, unda bo tin hende cu ta haci cambernan limpi, cu ta un trabao hopi pisa, y den su mayoria ta wordo haci door di hende muhe tambe, y e tipo di trabao aki cu tempo ta hiba na problemanan fisico. Problemanan cu lomba, heup, pia” Hose Figaroa a comenta.
Figaroa a sigui splica cu si no tin leynan cu ta proteha e condicion di trabao pa trahadornan mañan no haya nan salud afecta, bo no ta bezig manera mester ta pa bo trahadornan.
