ORANJESTAD (AAN): Astrid Britten di Biblioteca Nacional Aruba, Siegfried Dumfries di Departamento di Cultura Aruba y Mirto Laclé,
Gestor cultural lo presenta un programa multifacetico cu temanan sumamente interesante, entre otro cu presentacion di obra, charla, declamacion, documentario, musica y canto riba diaranson, 2 di September 2026, di 6.30 pa 9.00 p.m. lo tin un actividad literario cultural na Biblioteca Nacional Aruba, George Madurostraat, Oranjestad.
Dr. Artwell Cain lo ta presente pa lansa y presenta su obra historico-antropologico ‘St. Eustatius: Restoring Our Ties. The voices of Statians making a difference’.
Na aña 2021 un santana historico a keda excava na St. Eustatius na unda a saca e restonan mortal di personanan sclavisa di Africa.
A estaya protesta di parti di esnan di kendenan nan ancestronan tabata dera den dicho cementerio.
E buki ta duna e habitantenan bos y ta presenta resultado di un estudio di nan pensamento y sentimento relaciona cu nan ancestronan, nan identidad, conmemoracion y e proceso di bolbe dera e restonan di e ancestronan.
E autor Dr. Artwell Cain ta un antropologo cultural y un investigado independiente. Su interesnan investigativo ta consisti den estudionan di etnicidad y formacion di identidad, sclavitud trans-atlantico y herencia cultural.
Como invitado special drs. Luciano Milliard di Universidad di Aruba lo duna un relato encuanto e bida na St. Eustatius.
Drs. Mirto Laclé lo duna un introduccion relaciona cu bosnan di Resistencia di historia di sclavitud.
Lo tin un manifestacion cultural cu ta consisti di musica y canto.
E musico, Frankie Arrindel, lo percura pa deleita publico cu musica di steelpan.
Tio Ali for di Corsou lo ta presente, hunto cu amigo musiconan di Aruba, pa duna un presentacion di musica ritmico y canto.
E buki ‘The voices of Statians making a difference’ lo ta obtenibel durante e anochi aki.
Entrada pa e presentacion aki ta completamente gratis.
