AZV cu tip di dia:
ORANJESTAD (AAN): Riba Facebook por a mira cu AZV ta dunando algun tips na e pueblo en general.
Un di e tips cu AZV tambe ta dunando ta relaciona cu e temporada di vakantie.
Nan ta indica cu pa e gran mayoria di hende vakantie ta e periodo mas dushi di aña. Ta haci preparacion pa pasa dushi dianan na hotel aki na Aruba mes of ta cumpra ticket di biahe pa bay conoce otro pais.
No obstante cua pais bo tin pensa di bay bishita, seguro AZV ta recomenda pa bo prepara bo vakantie bon anto vooral si tin pensa di bay den exterior.
Ta importante pa prepara for di tempran. Kico tur bo por haci pa subi avion trankil?
1) Informa na Departamento di Salud Publico of Departamento di Malesanan Contagioso si e pais cu bo ta bay ta rekeri di vacuna pa cierto malesa. Haci esaki cu suficiente anticipacion ya cu algun vacuna ta tuma tempo prome cu nan traha y pues bo kier por biaha na momento cu ya e vacuna ta "activo"
2) Informa tocante documento di biahe. Por ehempel si ta suficiente cu bo tin bo paspoort of si ta rekeri di otro documento di biahe, manera por ehempel permiso turistico (visa).
3) Informa y boek bo ticket di biahe na tempo. Sea bo ta haci esaki digitalmente of bo ta pasa personalmente na e agencia di biahe.
4) Informa tocante prijs di estadia sea ta air b&b, apartamento of hotel. Esaki ta duna miho bista tocante kico ta yega dentro di bo presupuesto y kico bo lo mester warda pa por ehempel excursion.
5) Informa y cumpra seguro di biahe. Esaki ta principalmente importante pa evita cualkier eventualidad medico inespera.
6) Tambe un seguro di biahe ta yuda cubri gastonan ora di perdida di maleta of ladronicia di por ehempel ekipo importante cu bo tin cu bo, manera laptop, camara of celular.
7) Informa tocante e excursion of actividad cu bo kier bay. Tin algun cu bo lo mester reserva fecha y orario pa bay. Pone esaki den bo agenda pa asina bo no perde chens.
8) Corda riba remedi. Si bo ta pashent cu ta uza remedi pa un malesa cronico, percura pa bo tin un lista di bo remedinan sea den bo celular of den bo bloknote y hiba suficiente remedi, es decir pa ful e periodo di vakantie. Si ta posibel, hiba un declaracion medico cu bo den idioma Ingles. Esaki por yuda den cualkier emergencia.
9) Percura pa pone tur documento di biahe den un solo luga, sea digitalmente den bo celular of hard copy den un map.
10) Warda tur number di telefon cu ta importante den bo celular. Skirbi y hiba e numbernan tambe den un bloknote chikito. Den cualkier situacion incluyendo ora bo no tin acceso na bo celular of ora e bateria di e celular baha, bo tin e lista di number disponibel.
11) Percura pa bo warda un scan of potret di bo paspoort of ID den bo celular.
12) Tambe percura pa bo tin un copia (hardcopy) di bo paspoort of ID. Esaki bo por warda den bo maleta of dobla chikito chikito por ehempel den bo mea. Tambe bo por mand'e pa un miembro di famia den kende bo tin hopi confiansa. Kinan tambe ta conta, cualkier calamidad bo tin un copia di e documento importante aki cu bo of bo famia por prueba paso nan tin bo copia.
13) Si bo ta gusta keiro y wak arkitectura of bishita museo, ta importante pa bo no perde den e ciudad cu bo ta bishitando. Percura pues pa download mapa di e pais of ciudad cu bo ta bay. Asina semper lo bo tin e mapa warda den google maps y bo por controla den esaki cu regularidad si bo ta bayendo den bon direccion.
14) Haci maximo uzo di e espacio den bo maleta. Aki ta conta cu lora paña ta dunabo e opcion pa hiba mas paña na luga di dobla paña. Den caso cu bo ta hiba un zapato of keds extra den maleta, corda cu bo por warda mea of faha lora den dje.
15) Si por, haci uzo di maleta cu tin lock (code) of cumpra un lock chikito apart.
16) Haci uzo di ziplock of un etui pa warda tur charger of earphones.
17) Corda di hiba un adaptado/transformado universal di coriente den caso cu ta bay un pais cu ta haci uzo di 220V enbes di 110V. Den caso cu bo a lubida esaki, wak tras di e screen di e television den bo hotel ya cu e gran mayoria di television moderno tin un usb-poort y pues ta dunabo e opcion pa recarga bo celular via e television.
18) Haci uzo di un toilettasje of ziplock pa warda shampoo, pasta di djente, remedi y
producto di cuido personal. Den caso cu bo kier evita pa boter di likido no basha por haci
uzo di luminiumfoil rond di e boter tambe.
19) Haci uzo di machine "ATM" na luga di oficina di cambio. Via machine "ATM" bo por pin directamente y aunke tin gasto toch esaki nunca no ta mes halto cu si bo "cambia placa" na oficina di cambio. Generalmente e oficina di cambio ta cobra gastonan adicional of mas halto cu di banco. Of paga cu carchi tur caminda (swipe/tap).
20) Awor mas cu claro cu lo bo a spaar hopi placa pa bo biahe, pero asina mes semper ta recomendabel pa haci calculacion di mas o menos cuanto placa bo kier gasta pa dia na por ehempel cuminda y of bebida conforme e presupuesto cu bo tin. Asina bo ta sigur di keda trankil paso bo presupuesto ta yega te cu bo ultimo dia di vakantie den exterior.
21) Cumpra awa di boter y percura pa no come tur cos di riba caya.
Feliz biahe!
