ORANJESTAD (AAN) – Rino Hermans, Director Interino di Bureau Rampenbestrijding Aruba (BRA), den entrevista cu DIARIO a splica cu e aña aki lo tin 17 sistema cu lo haya nomber. Arlene ta e prome cu a bay caba, y aworaki por wak den Oost Caribe, cu e sistemanan ta bay drenta pero te cu e ultimo update, e no a influencia e Islanan
di Reino Hulandes.
Hermans a subraya cu nos Isla no tin ningun efecto directo, na Augustus, September y October ta e peak, y aworaki por ripara cu siman pasa tabata tin siete ola tropical tras di otro.
“Y aworaki por wak cu esun cu ta formando, desaroyando, ta drentando oost Caribe. Kiermen, cu na cierto momento e cambio di clima ta influenciando e patronchi di horcan y ta keda nos pa sigui prepara, monitorea y informa comunidad atravez di prensa local, pa e informacion ta concreto. Hunto cu Departamento Meteorologico nos ta monitorea esaki constantemente, informa otro, y na momento cu tin un aviso di peligro inminente pa Aruba, nos lo sa di avisa pueblo den prensa local”, señor Rino Hermans a duna di conoce.
Hermans a agrega cu desde 2016 nan a structura e Crisis Team Nacional, y nan ta bin ta reuniendo frecuentemente. “Kiermen e ta un team hopi solido y masha poco cambio a tuma lugar, y esaki ta bin hunto na Mei, hunto cu e Crisis Team. Dia 15 di Mei, Minister Presidente ta manda instruccion pa tur e departamentonan di Gobierno pa prepara y realiza nan plan. Asina, den cualkier eventualidad, nos por recupera hopi mas lihe”, señor Hermans a señala.
El a agrega cu nan no por mitiga un storm di pasa haci daño na Aruba, pero si nan ta prepara pa recupera hopi mas lihe, despues di cualkier incidente.
BRA tin contacto cu Hurricane Hunters, y na momento cu nan tuma nota di un siguimento di operacion local, cu ta na Aruba, nan ta contacta BRA y nan ta touch tur e plannan, kico ta e necesidadnan ora nan ta bin opera na Aruba. Meteo lo haya aviso di Hurricane Hunters. Kiermen, tur e contactonan externo ta in place caba. BRA ta revisa tur plan.
“Dos siman pasa e contacto tabata den Reino Hulandes, con ta bay asisti otro. Esey kiermen cu den e parti di planning nos ta riba schedule, y awo nos tin cu concientiza e pueblo con mester sigui prepara pa cualkier eventualidad, pasobra e cambio di clima ta afectando e region cu horcan”, Rino Hermans a remarca.
