Señora Jasmira Mora, Coordinadora di POH:
ORANJESTAD (AAN): Señora Jasmira Mora, Coordinadora di POH, a señala un preocupacion grandi pa salud di un grupo di adulto hoben cu na ora di haci chekeo medico, ta ripara cu nan tin presion y suco halto.
El a splica cu e preocupacion den esaki ta pasobra e grupo aki no ta sinti ningun sintoma. Nan ta sigui nan bida normal pasobra nan no sa nan condicion. Y door cu ta trata di hende hoben, hopi biaha e pensamento tey cu nan por tuma alcohol y come tur cos. Esaki ta hacie hopi mas pio, sigur si e persona no sa cu e ta sufri di tal malesa.
Segun señora Mora, esaki por resulta tambe cu e personanan aki por haya un blackout si e presion of suco subi hopi halto. Esaki ta hopi peligroso specialmente si ta stuur. Ta importante pa haci un chekeo medico y si constata cu un di bo numbernan ta halto, pa keda monitor y cuida. Principalmente, den e dianan aki di fiesta, pa no bay haci dimas cu cuminda y alcohol.
Señora Mora ta pone enfasis pa haci mas uzo di awa specialmente si ta uza alcohol of come cuminda vet, cu suco, of cuminda cu hopi salo. Ta remomenda pa uza entre 6 pa 8 glas di awa pa dia. Cuida bo salud.
