Clifford Heyliger di AVP
ORANJESTAD (AAN): Parlamentario Clifford Heyliger (AVP) ta pone atencion riba e preocupacion den comunidad pa e aumento di problema mental na Aruba, specialmente entre hobennan caminda depresion, ansiedad y casonan lamentable di suicidio ta tende mas frecuente. Segun Heyliger, salud mental mester worde trata cu mes urgencia manera salud fisico, y Aruba no por perde tempo pa implementa un strategia cla y structural.
Durante su intervencion, Heyliger a indica cu e isla ta falta programa robusto pa deteccion trempan di problema mental. Su pregunta principal na Minister di Salud ta orienta riba si Aruba actualmente tin un plan nacional pa salud mental, con esey ta worde implementa y monitor, y si e programa existente ta suficiente pa atende e realidad social cu ta cambia rapidamente. E ta enfatisa cu hopi famia, scolnan y comunidadnan no tin herment of apoyo suficiente pa detecta señal di problema mental na su fase inicial, cu por preveni situacion mas grave mas dilanti.
Heyliger tambe a expresa duda tocante disponibilidad di profesional den sector. Segun e parlamentario, Aruba ta experimenta un incremento constante den demanda pa psicologo, psikiatra y trahado social, pero no ta cla si tin capacidad suficiente pa atende tur caso den manera digno y eficaz. E ta lamenta di mira cu hopi hende ta keda sin atencion na momento crucial, simplemente pa motibo di falta di recurso.
Un otro punto di preocupacion ta relaciona cu scolnan, caminda problema mental entre hobennan ta presenta cu mas frecuencia. Heyliger kier sa con scolnan ta prepara pa reconoce señal trempan y ki tipo di apoyo psicologico ta disponibel de forma structural. E ta insisti cu scolnan tin un papel fundamental den prevencion, y sin un sistema di apoyo continuo, hopi hoben ta risca di keda sin ayudo.
Den ambito laboral tambe Heyliger ta mira un reto creciente. Burn-out, stress di trabao y ausencia prolonga pa motibo mental ta costa e pais un cantidad economico considerabel, pero no ta cla si tin investigacion nacional pa cuantifica e impacto real.
Heyliger ta pone fin na su declaracion cu un mensahe potente: “Salud mental no por keda un tabu na nos sociedad. Nos pueblo, y specialmente nos hobennan, ta merece proteccion, orientacion y un sistema di cuido digno. E situacion ta urgente, y Aruba mester bolbe serio riba e tema aki prome cu mas bida haya un fin tristo cu por a preveni.”
