*e prioridad den su agenda hunto cu DOW ta tene Aruba limpi
ORANJESTAD (AAN) – Minister Presidente Evelyn Wever-Croes, a menciona den un entrevista cu DIARIO, cu un Aruba limpi ta un tema cu tin prioridad den su agenda di su persona cu DOW.
E dignatario tambe ta ripara cu Aruba a bira mas sushi, y e ta lamenta cu e ta coincidi cu ciere di dump pasobra e ta mustra cu ciudadanonan, sea pa conveniencia of pa deshaci di sushi na un manera mas facil, y hasta talvez pa protesta, no a tene nan mes na e regla di tin Aruba limpi y a dicidi di tira sushi tur caminda. “Esey ta di lamenta!” e Premier a expresa.
E mandatario, papiando cu DOW a haya sa cu nan a tuma un area specifico den Playa cu nan ta haci limpi tur dia, di mainta 8’or te atardi 4’or. Nan ta yega su mainta siguiente y ta hay’e casi mes sushi; nan ta haya sushi tira atrobe.
Esaki no ta algo cu DOW so tin cu haci. E ta un trabao cu nos tur tin cu haci pa tene Aruba limpi. Aworaki, e trabao di limpieza ta parti den diferente area y diferente ministerio, e dignatario ta agrega. Entre otro, e ministerio di Minister Ursell Arends, Serlimar y City Inspector, y DOW cu ta resorta bao Minister Presidente su ministerio. “Y mi a pidi nan un plan di urgencia con nos ta bay atende cu esaki. Ben e plan di urgencia ta bay tin tambe boetmento na hende cu ta tira sushi riba caminda. Si nan por detecta y yega na esun cu ta tira sushi, e ora ey lo tin medidanan cu mester wordo tuma, pasobra asina, nos no por continua”, Minister Presidente a subraya.
El a agrega cu e sushedad aki ta un peligro na momento di calamidad, pero tambe ta un mahos bista pa nos tur cu ta biba aki riba y ni pensa mes kico e turistanan ta pensa.
“Pues, esaki ta un tema di prioridad y lamentablemente tin cos cu ta coincidi cu otro, y aworaki nos tin cu brinda e problema aki cu ta hopi serio”, Minister Presidente a expresa.
Mirando cu for di 1 di Juni e temporada di horcan a cuminza, y cu sushi acumula riba caminda ta un peligro, e dignatario a comenta cu unico cos cu comunidad por haci ta prepara miho posible. Prepara e cura di cas, e dak y e cas, percura pa caminda awa tin cu pasa no wordo blokea pa sushi, y na di dos lugar, sigui e canalnan oficial pa no drenta innecesariamente den panico. BRA lo informa si tin algo, y ki medida mester tuma, pero si, locual cada un di nos tin cu haci prepara cu ta e miho manera pa recupera di cualkier calamidad, ta si cada persona ta bon prepara, y esaki ta conta pa gobierno, pa DOW, pa BRA, pa pais Aruba, Minister Presidente a remarca.
