ORANJESTAD (AAN): Den e ultimo dia y simannan aki por a nota atakenan feros di algun persona contra Prome Minister Evelyn Wever-Croes y famia,
especialmente su yiunan. Prome Minister a expresa cu e ta obliga di reacciona mirando cu e atakenan di personanan aki no ta stop pero ta bira cada dia pio.
“Mi tin cu para keto especialmente na e dos periodista cu tur dia ta saca nan gal contra mi na radio. Nan ta ataca mi y nan ta ofende mi na formanan hopi baho. E mas tristo ta cu nan ta ataca mi famia tambe”, Prome Minister a duna di conoce.
Prome Minister ta enfatisa cu e atakenan aki ta falso y tur e acusacionnan aki ta mentira. Un acusacion contra Prome Minister y famia ta di tin un organizacion criminal y ilegal na su cas, bendiendo cosnan ilicito. “Esaki no ta berdad. Na mi cas ami ni mi yiunan tin ningun organizacion ni negoshi, ni legal y sigur no ilegal”.
E periodistanan aki ta acusa yiunan di Prome Minister di haci uzo di VIP Room di airport ora nan biaha y asina keda sin paga invoerrechten. “Sigur esaki tampoco ta berdad. Mi yiunan ta drenta mescos cu tur hende via entrada principal y ta sali via Douane via salida principal y ta pasa den tur control”, Prome Minister a duna di conoce.
“Nan ta acusa mi mayornan di casi 80 aña di a emplea un persona ilegal, cual no ta berdad at all. Nan a acusa mi di a mete den husticia pa proteha mi yiu. Cual tampoco ta berdad. Semper mi a bisa cu cada ken cu haci algo mester sinta riba su blaar. Y den husticia ami no por y mi no a mete nunca. Nos tin un procurador general encarga cu investigacionnan, y nan ta haci nan trabao totalmente independiente di Gobierno”.
Prome Minister ta afirma cu ningun di e acusacionnan aki ta berdad, tur ta mentira y nan no por presenta ningun prueba pasobra nan no tin ningun prueba.
“Pasobra keremi, si nan tabata tin prueba, nan por a entrega keho contra mi. Pero nan no a haci’e. Ami si a entrega keho contra tur esnan cu ta lansa acusacionnan falso contra mi. Nan a instiga contra nos famia, pasobra mi yiu ta bay casa. Mescos cu miles di mama y tata di famia na Aruba, momento cu un yiu ta bay casa ta un momento di hopi felicidad pa e famia. Pakico nan kier purba kita nos paz na e momentonan ey, mi no ta compronde, pero nos a dicidi cu nan lo no logra”.
Prome Minister a duna di conoce cu asina tin hopi mas ehempel con negativismo di algun hende ta dirigi fuertemente riba dje e dianan y temponan aki.
“Pero ami a dicidi cu e negativismo ey lo no afecta mi. E ta NAN problema si nan ta negativo, no di mi. Loke mi ta lamenta, ta cu nan no ta ataca ami so. Nan ta ataca mi famia y den e caso aki, mi yiunan. Esaki ami no solamente ta lamenta, sino mi ta haye hopi cobarde tambe. Pasobra e politico aki ta ami, y si bo kier debati cu mi riba cualkier topico, semper mi ta dispuesto. Contal cu ta berdad, pasobra sino, ta shisheria, y mi no por perde tempo cu shisheria. Mi tin cu goberna nos pais.
En general, mi ta lamenta e negativismo cu nan ta purba inculca. Ora bo ta negativo, bo ta mira problema y reto so. Ora bo ta positivo, bo ta mira solucion y oportunidad.
P’esey ami ta scoge pa ta positivo, pa no worry mi cabes cu negativismo.
Kehonan a worde entrega na autoridadnan, y mi ta confia autoridadnan den nan trabao, y por lo demas, mi ta laga nan pa Dios. Y mi ta concentra tur mi energia y esfuerso den goberna e pais aki y dedica mi na mi hogar y mi famia. Mi ta kere cu mi tambe tin derecho riba dje.
E motibo di e reaccion aki ta pa sigura tur ciudadano di nos pais, cu tur loke nan ta ataca y cuestiona mi di dje, ta falso. Pa mi, integridad y bon gobernacion semper lo ta mi compas. Mi a baha gobierno pa motibo di kiebro di integridad. Ta algo cu mi no ta haci wega cu ne.
Nos ta den temporada di Pasco y fin di aña, y lo mi desea di mira nos trata otro cu respet. Y cu paz y harmonia por reina den cada hogar aki na Aruba y rond mundo.
