ORANJESTAD (AAN): Durante Conferencia di Gobierno, Prome Minister Evelyn Wever-Croes a informa cu e siman aki lo atende e conferencia “Un 2023 Water Conference” cu lo tuma luga na New York.
Un tema relevante cual Prome Minister lo ta atende conhuntamente cu Minister Ursell Arends di 22 pa 24 di maart, pa trata entre otro desaroyonan di awa mundialmente y nan efecto riba Aruba.
Nivel di awa mundialmente ta aumentando cual ta pone reto grandi pa islanan rond mundo y Aruba no ta excepcion. Prome Minister Wever - Croes, durante di conferencia di gobierno a splica cu ta trahando riba un mapa climatologico di Aruba caminda cu ta indica si nivel di awa subi, cua ta e partinan na Aruba cu ta cuminsa bay bou awa. Esaki ta un problema cu ta exigi compromiso di henter mundo pa soluciona.
Prome Minister Wever - Croes a splica cu tur e islanan cu ta parti di Reino Hulandes ta riba nivel di awa, pero si nivel di awa keda subi, e lo causa problemanan cu consecuencianan severo. Mescos cu awa ta duna bida, awa ta kita bida tambe. Pesey e ta hopi importante pa tuma accion y pa mundo henter tuma accion y mustra e compromiso. Basa ariba esaki, Reino Hulandes ta organiza e conferencia di awa na Nacionnan Uni e siman aki.
Gobierno di Aruba a ricibi e invitacion di Gobierno di Hulanda pa participa na e nivel di mas halto cu ta posibel. Consecuentemente mirando cu ta Rey Willem Alexander ta guia e conferencia aki, a acepta e invitacion y Prome Minister conhuntamente cu Minister Ursell Arends, lo atende e conferencia. Minister Arends tin e cartera di Naturalesa bou su encargo y Prome Minister tin aspectonan infrastructural y adaptacion cu mester tuma luga pa motibo di cambio di clima den su ministerio. Apart di esey, Prome Minister Wever - Croes tin e rol pa reemplasa Rey Willem Alexander cu ta e presidente di e conferencia ora cu e no por ta presente, durante e 3 dianan aki y guia e reunionnan den su nomber. Ademas, tanto Minister Arends y Prome Minister Wever - Croes, lo ta orador na diferente ocasion durante e conferencia.
Prome Minister lo tin un enfoke special riba e posicion di hende muhe, pasobra mundialmente ta comproba cu hende muhe ta esunnan cu ta mas afecta pa cambio climatologico. Esaki ta algo cu kisas no ta ripara mucho di dje na Aruba, y pa motibo cu no kier pa esaki manifesta su mes tampoco, e ta importante pa tuma accion awo.
Prome Minister a indica cu na final, Minister Arends den nomber di Aruba, lo duna cierto compromiso cu Aruba lo percura pe, entre otro pa tin awa limpi y pagabel pa tur hende. Lo compromete pa traha riba plannan di adaptacion pa cambio climatologico, y tambe con ta bay reconfirma compromisonan pa por logra desaroyo sostenibel den cuadro di e Metanan di Desaroyo Sostenibel / Sustainable Development Goals (SDGs) cu a propone.
Finalmente, Premier Wever-Croes a acentua cu e ta importante pa den un escena manera esun di Nacionnan Uni, bati alarma pa tur pais realisa cu esaki ta e momento pa tuma accion, sino paisnan chikito manera Aruba ta haya e cuenta pa paga. Ta mirando esaki caba a traves di daño na medio ambiente cu ta causa cambio climatologico y sushi cu ta laba bin costa procedente di otro pais.
