ORANJESTAD (AAN): Dos siman pasa Diabierna durante tratamento di presupuesto,
ya caba fraccion di partido PPA a mustra su inkietud y e preocupacion cu tin riba full e desaroyo global cu tin na e momentonan aki, mas ainda mirando e expresionnan di presidente di Merca Donald Trump.
Esaki parlamentario y lider di partido PPA Otmar Oduber a trece dilanti Dialuna mainta durante un conferencia di prensa.
El a sigui bisa cu fraccion di PPA e dia ey a haci varios pregunta por escrito na minister di Economia.
“Mi ta gradici e minister cu el a contesta, pero el a keda di banda nos varios documento riba estudionan cu a wordo haci y ki efectonan e medidanan di Merca lo tin riba nos isla”.
Sinembargo den e siman cu a transcuri nos ta mirando cu e consecuencianan ta birando mas serio ainda, si bo tende e declaracionnan di e CEO di CARICOM, kende ta mustra riba e hecho cu e medidanan ta bay tin un consecuencia hopi grandi pa e region Caribense, segun Oduber.
El a sigui bisa cu e declaracionnan di e presidente di Comerciantenan Uni di siman pasa tambe ta mustra cu tur producto cu excepcion di comestibles, ta bay subi di prijs.
Ta bay tin un aumento di prijs di entre 5 cu 15%.
“Mirando e hecho cu expertonan y economistanan local ta mustra riba e consecuencianan serio pa pais Aruba, nos a haya hopi importante pa dirigi un di dos carta pa minister di Economia y pa otro ministernan die Gobierno aki, pa puntra kico ta wordo haci pa loke ta e situacion aki”.
Hopi Gobierno a priminti pa evalua e posibilidadnan pa importa mas for di lugarnan manera Colombia y Costa Rica, pero no a bin un plan concreto ainda pa por ehempel importa galiña y carni for di e paisnan aki, segun e lider di PPA.
El a splica cu e opcionnan aki lo yuda baha e gastonan y prijsnan pa e consumidornan.
“Lamentablemente tur esakinan a keda djis un promesa y pesey den e carta nos a papia no solamente riba e consecuencianan di asina yama tarifanan cu Merca kier bay implementa, pero tambe riba e posibilidadnan pa importa mas for di otro paisnan manera Colombia y Costa Rica”.
Locual ta haci e situacion ainda peor ta e sistema di BBO cu nos tin na Aruba, pasobra riba e prijsnan di importacion cu ta ay subi, bo mester bay paga un BBO cumulativo, segun Oduber.
Pesey e ta haya cu mas liher posibel mester implementa un sistema di BTW enbes di e BBO.
