Ralhp Maduro, Director ta relata:
ORANJESTAD (AAN) Den entrevista cu señor Ralph Maduro, Director di Power FM, a elabora tocante e celebracion di e di 13 aniversario di e empresa aki y con el a cuminza, y cu hopi orguyo y alegria, Dia 1 di September, el a celebra cu e comunidad di Aruba, diestres aña despues.
“Ami ta bin di un background di publicidad, mi tin un empresa di publicidad y printing pa mas di 22 aña caba, y semper, e gana di loke ta media, advertisement, etc., tabata den mi na un edad hopi jong. Y asina ey, nos a bin concretizando ideanan. Semper e idea tabata tin un radio, television, corant; nos a logra radio, nos a logra television pa un tempo cortico, e corant esey no a pasa, apesar cu tabatin hopi negociacion e temponan aya, pero cu paso di tempo esey a cay na awa, pero sigur nos t’akinan ketobay”, señor Maduro a señala.
Den su tereno tin varios reto, Ralph Maduro a subraya. “Aki na Aruba, nos ta den un Isla asina chikito di mas of menos 130 mil habitante, y nos tin 21 radioemisora. Kiermen, pa competi ya caba cu 21 stacion di radio e ta un competencia fuerte pa bo mantene bo mes den e topnan cinco, y hopi biaha bo ta bay pa temporada den e prome dosnan, despues bo ta baha un tiki, bo ta inventa, bo ta brain, bo ta bin bek. Esey caba ya ta un reto grandi, pero despues di esey a bin tur e medianan social”, Maduro a indica.
Aworaki tin tanto red social, cu e mes no tabata conoce. Esey ta un competencia grandi, pasobra e comerciante cu a lo largo ta esun cu ta mantene e radio-emisoranan na bida, tin cu analiza na unda e ta tira su budget pa mercadeo.
“Y den e caso aki nan ta reparti’e un tiki aki un tiki aya, y tur esaki ta un competencia grandi, y e reto cu tin ta pa bo actualiza y keda den dje. Esey ta na unda e sanger nobo ta bay yuda nos cu esaki pa nos ta mas activo, mas presente den e rednan social”, Ralph Maduro Director di Power FM a relata.
