ORANJESTAD (AAN): E mal tempo cu riba Diahuebs mainta a wordo yama ‘Potencial Depresion Tropical Diestres’ door di National Hurricane Center,
a pasa ayeranochi y marduga zuid di Aruba. El a pasa net riba Peninsula di Paraguana.
El a pasa tanto pazuid di Bonaire, pazuid di Curaçao, y pazuid di Aruba siguiendo pa bay pabao rumbo pa Colombia.
Pesey mes desde Diahuebs mainta caba, Gobierno di Colombia a emiti un ‘Tropical Storm Warning’ pa e costa di Colombia, for di e frontera cu Venezuela bay te na Rio Hacha. Tambe a emiti un ‘Hurricane Watch’ pa e islanan di San Andres, Providencia, y Santa Catalina cu ta pertenece na Colombia.
Diahuebs atardi 5:00 pm, e potencial Depresion Tropical Diestres aki tabata na 11.6º Nort y 68.7º West. Esey tabata como 155 km zuidoost di Aruba e momento ey. Bientonan maximo sosteni tabata di 55 km/h, y e tabata moviendo direccion west cu 28 km/h.
National Hurricane Center a nota cu e maltempo aki a bira mihor organiza, y cu awe ainda Aruba por spera awacero despues cu el a pasa.
Su pasamento asina cerca di Venezuela, a causa hopi yobida torencial riba e teritorio venezolano, incluyendo e capital di Caracas cu a yena cu awa.
Segun e pronostico, awe merdia 2’or e centro lo bay ta den area panort di Riohacha na Colombia. Diadomingo mainta e lo bay ta subiendo costa di Nicaragua na Centro America. E lo sigui e ora pa Honduras y Guatemala.
