Postura Reino comprendibel pero mester haci husticia den politica
- Aruba a zink ora Mike a ignora Colegionan halto di estado!
- Interpretacionnan di Statuut ta caminda e rabo di porco ta krul
ORANJESTAD (AAN)- Pa cuida Ley, Aruba tin Colegionan Halto di Estado, cu ta Parlamento, Algemene Rekenkamer Aruba y Raad van Advies.
Ley ta regla cu Raad van Advies ta e consehero independiente mas halto di Gobierno y Parlamento.
Na 2007 a surgi un crisis financiero mundial, un recesion.
Pa Aruba comprende e realidad awe Aruba tin e ehempel di e situacion cu a wordo crea dor di Covid-19 y e Guera di Ukraine, cu a resulta den un atake frontal di inflacion.
Prijsnan cu a subi manera fli den biento, a anuncia un recesion di diferente grado na paisnan grandi awor.
Pues pa comprende e situacion di Aruba na 2007, ora recesion mundial a bati na porta, mester mira solamente nos situacion actual y e forma cu prijsnan a subi na nivel mundial.
Pa Aruba por a alcansa un maneho financiero sano, na 2007 mester a reforma e sistema di belasting.
A introduci un sistema di belasting indirecto cu a haci cu a baha e peso di belasting directo manera belasting riba entrada y ganashi.
Esaki tabata e oportunidad pa Mike Eman bula den politica cu e sabiduria cu e por deshaci di BBO, sin splica con e lo a restaura e belastingnan cu a baha den un mundo den recesion.
Na 2010, Mike Eman, a splica Aruba cu e no por deshaci completamente di BBO, pero cu el a percura pa baha BBO cu mitar.
Pueblo a bati man pasobra Pueblo no a haya oportunidad pa mira e rapport di e Colegio Halto, Raad van Advies cu tabata adverti Mike Eman pa loke e ta haci.
Ora Mike Eman a baha BBO el a bay contra advertencia di Raad van Advies.
Ta loke Raad van Advies a trece dilanti a socede, manera cifranan produci pa Algemene Rekenkamer Aruba, ta indica.
Gobierno Eman a cuminsa goberna cu por ehempel loke a drenta di BBO tambe di Valero, placa di Plant Hotel. Sinembargo, planea un maneho financiero no por ta a base di entrada incidental.
Mike Eman cu a bay contra reglanan di bon gobernacion manera hancra den Ley di Contabilidad, cu ta garantisa bon maneho financiero di e pais, cu finalmente a conoce e Ley di Caft, cu a pone oposicion di Partido MEP e tempo lanta para y bini cu e accion Awor T’e ora. Partido PDR tambe a lanta contra Gobierno di Mike.
E tabata un accion dirigi contra e forma cu Gobierno Mike Eman tabata gasta placa di Pueblo sin reserva algun.
Den proyeccionnan pa 2018 hasta tabata tin instancia oficial cu no por a duna un pronostico total y hasta Banco Central a mustra den su pronosticonan cu hopi tabata depende di e realisacion di e proyecto di Citgo, cu finalmente a wordo geschrap.
Na 2020, Secretario di Estado Hulandes, Raymond Knops a splica cu Aruba sin asistencia Hulandes, lo tabata den estado di bancarota.
Awe un prestamo Hulandes mester asisti Aruba financieramente y Hulanda ta exigi introduccion di un supervision a base di un Ley di Reino, cu Gobierno Wever-Croes ta rechasa en busca di un supervision a base di un Ley Arubano.
Pakico?
Supervision ta keda un medida cu ta papia di mal gobernacion na un pais sigur pa Aruba, cu bou gobierno di Mike Eman, a entrega prueba di un gobernacion financiero cu a destrui e base financiero di e pais.
Historia lo papia di introduccion di un ley di supervision durante Gabinete Wever-Croes cu ta e gobierno cu a percura pa recuperacion di Aruba.
Awor kico e miedo di Hulanda ta awe? E miedo di Hulanda ta, cu Aruba por bolbe cay den gara politico di Mike Eman, cu a trapa cu dos pia riba Ley di Contabilidad y tur loke ta sostene un Estado di Derecho.
E miedo cu Mike of un figura manera Mike por bolbe lanta Pueblo pa bay manifesta cu Mike supuestamente muriendo den huelga di hamber.
E miedo cu Mike Eman of un copia di Mike Eman lo asumi responsabilidad gubernamental atrobe cu asistencia di un mayoria den Parlamento cu ta haci y deshaci loke Mike Eman kier, ta e problema.
Pa ta sincero, hopi hende na Aruba ta cuestiona e poder di Parlamento. DIARIO ta mantene e punto di bista cu Ley di Contabilidad mester wordo mara na castigo den prison directamente y un bon sistema di supervision.
E pregunta central na e momentonan aki. Si Mike Eman, cu supervision di Parlamento y guia y control di instancianan imparcial a haci manera e tabata kier y a destrui base financiero di Aruba, con ta evita ripiticion?
Pero kico Statuut ta permiti segun tanto interpretacion? Aki ta caminda e rabo di porco ta krul!
