Frans Ponson di Comerciantenan Uni Aruba:
ORANJESTAD (AAN): Frans Ponson di Comerciantenan Uni Aruba (CUA) a duna di conoce cu e idea a bin pa e turistanan cu ta esunnan cu mas tanto ta uza credit card, pasobra e localnan ta uza debit card, pa cobra nan e 'fee' di banco pa credit card pa no bay subi prijs.
A indica cu banco ta bisa cu ningun comerciante no mag di cobra un turista e 'credit card fee' aki. "Awe nos kier mustra con ridiculo e cos aki ta birando, Ponson a expresa.
El a sigui bisa cu tur hende na Aruba cu ta bishita Merca ta bay haya un 'credit card fee' di 2.5% 'surcharge' pa tur credit card. Na Merca esaki ta usual tur caminda. Te hasta pago cash tin un prijs y cu carchi tin otro prijs y esey ta algo normal, a remarca.
Banda di esaki a referi na un ley cu a pasa na New York na 2024 cu ta bisa cu mester bisa e cliente kico ta cobr'e.
Den e mesun ley aki, a agrega, ta bisa cu e regla nobo no ta aplicabel pa debit card. Kiermen cu debit card na Merca di berdad no mag cobra e consumidor. Pero, gobierno Mericano mescos cu Union a percura pa e pueblo y a pasa un ley caminda tin un maximo kico Master Card mag cobra na e pueblo. A bisa e comerciantenan cu no por cobra e cliente y a zorg pa debit card tin un fee abao mescos cu Europa.
Segun Ponson, na Aruba, no solamente no mag cobra e credit card aworaki, pero door cu gobierno no a regla e ley aki, e debit card di e pueblo a bira casi e suma di e credit card.
"Kiermen nos no por ni cobra e credit card na e turista, pero nos debit prijs, door cu na Aruba si nos no a proteha e consumidor, a bira casi mescos cu credit card", e representante di CUA a indica.
Frans Ponson a splica kico esaki ta significa. E ta bisa cu e comerciantenan mester bay sinta cu e asociacion di banco, cu gobierno hopi lihe pa bin cu un solucion riba e asunto aki. Si no bin un solucion comercio tin cu bay hinca e 'banking fee' aki den prijs. Esaki ta nifica cu tin un otro 7.5 di BBO cu tin cu bin riba dje cu tin cu pas'e pa pueblo.
A agrega cu banco kier lanta e fee, pero banco no ta laga comerciante pone e 'banking charge'. No mag di pon'e sino nan ta kita e mashinnan for di e comerciante. E comerciante tin cu bay scond'e den prijs. Pero si comerciante ta bay sconde e fee aki den prijs tin cu bay agrega 7% mas di BBO riba dje.
Ponson ta spera cu asina cu e gobierno nobo sinta cu por reuni lihe pa atende e asunto aki, sino tur comerciante na Aruba ta bay hinca e fee aki den prijs y ta bay bin atrobe un subida substancial di prijs.
Banconan kier pa yama e fee aki con cu ta, pero ningun comerciante kier bay yam'e 'Office Gasto pa laga comercio mustra malo. Mester yam'e 'banking fees'.
Nan ta cuestiona si esaki mag maske a firma pa esaki. Ta bay consulta esaki tambe cu e asesornan legal pa sa si esaki mag, Frans Ponson a indica.
E kier tambe pa banco na Aruba splica si tur caminda na Merca, esaki ta legal, pakico na Aruba no mag. Gobierno tin cu atende cu esaki lihe sino e lo bira un subida substancial den prijs cu lo afecta pueblo, a remarca.
