ORANJESTAD (AAN): Tabata Diamars madruga banda di 1:40 am, cu tanto Polis como tambe Ambulans a ser manda pa investiga un caso na Hooiberg, como cu yamada a drenta cu un persona no ta dunando señal di bida.
Polis a yega, y a bin haya e homber aki banda di su auto. Enberdad paramediconan a indica cu nan no ta sinti pulso, y via di Centro di Alarma a pidi pa presencia di Docter.
Docter Texier a yega y pa 2:30 am a constata morto di J.R. Croes di 57 aña di edad.
Recherche como tambe personal di departamento forensico di BFTO a yega pa asina yuda haci un investigacion, pa mira si tin algo incorecto a socede of no. Polisnan a pidi presencia di Slachtofferhulp pa bin duna un man.
J.R. Croes ta popular den e bario di Hooiberg, como cu semper bo ta mire ta saluda hende y ta cana riba caya, sea haciendo acera di cas of hasta e caya limpi.
E tin presencia tambe riba Social Media, specificamente e media nobo di TikTok unda el a bira un ‘influencer’ cu ta conta chiste na Papiamento eyriba. Eyriba e ta wordo yama ‘John Condon’.
Na famia di e fayecido, DIARIO ta manda palabranan di condolencia.
