AMSTERDAM: Riba Diamars, Polis na Amsterdam a comparti e storia encuanto un dama di 22 aña na Amsterdam Zuidoost, kende a fayece debi na complicacionnan di un ‘Brazilian Butt Lift’.
E asina yama ‘Brazilian Butt Lift’ (yama tambe BBL), ta un procedimento chirurgico popular cu a wordo desaroya na Rio de Janeiro, unda nan ta usa bo mesun vet di curpa pa asina hisa bo atras, haci nan mas rondo y mas yen. Pues bo ta engrandece e parti aki di bo curpa sin haci uso di implantenan.
E morto tristo di e dama hoben aki a socede aña pasa caba, pero Polis Zuidoost-Bijlmermeer a dicidi divulga e storia awor na comienzo di Augustus 2023.
Nan a relata con Polis despues di un yamada, a bin haya e dama drumi abao den gang largo di un cas. E tabata turdi, no por a papia drechi, y tabatin un mirada nubla den su wowonan. Hendenan a bisa Polis cu el a caba di haci un operacion, esta e asina yama BBL aki.
Den e rapport, e Polis a skirbi: “E victima ta empeorando rapidamente. E ta sclamando di dolor, e kier sea drumi of sinta, y a cuminza rindi su mes, pero no obstante esey mi a keda sinta banda di dje. Pero bo ta mira con e ta bay atras rapidamente, y dado momento mester a cuminza practica CPR riba dje. Hunto cu mi coleganan, nos a pone e aparato di AED pa cuminza reanime y trata di pone su curazon bati bek. Nos a haci tur cos pa rescata su bida. Pero e tabata bayendo mientras nos tine teni den nos mannan.”
Paramediconan cu a yega cu Ambulans despues, tambe a haci tur nan intento pa reanima e victima. A dicidi na hise den Ambulans pa asina e haya yudanza mas avanza na Hospital. Pero despues a drenta informacion rapido cu el a yega morto aya.
