Reaccion di Altocomisario
ORANJESTAD (AAN): A sali na cla, cu entrante 1 Januari 2025, pues e aña aki, Cuerpo Policial Aruba tin un maneho nobo den “strategia nobo den comunicacion”. Pa nan, esey nifica cu Cuerpo Policial lo reacciona riba noticianan cu ta wordo publica y cu segun nan opinion, no ta cuadra cu realidad. E reaccion di KPA ariba e medianan cu ta publica nan articulo, no ta basa pa ataca of crea enemistad. KPA su meta ta pa dialoga y uni cu otro pa asina informa e sociedad cu informacion corecto.
Cuerpo Policial Aruba ta reacciona riba e articulo publica e siman aki riba e seccion di Aruba di e portal di Amigoe, esta un articulo “Pers als Wapen, Hoe de journalistiek de samenleving verdeelt en instabiliteit zaait”.
Pa e publicacion di dicho articulo Cuerpo Policial no a wordo acerca cu ningun pregunta y of aclaracion. Den e articulo publica pa Amigoe ta referi na e comunicado di KPA, na unda Altocomisario sr Arnhem ta bisa cu e ta condena violencia contra miembronan di prensa pero como tambe contra tur otro hende.
Amigoe a trece dilanti cu Altocomisario ta haya critica pa cu esaki y e punto di bista di Arnhem ta unilateral. E periodista encuestion ta enfoca diariamente negativamente den su articulo y red social. Di e manera aki, e periodista ta contribui den e division social y daño contra personanan.
Reaccion di Polis: Den nan reaccion, Cuerpo Policial ta insisti na prome lugar cu violencia ta un acto castigabel cu semper ta condena pa polis. Actua contra violencia ta un di e tareanan central di polis.
Cuerpo Policial ta compronde cu e acusacionnan ariba persona den medianan social ta trece emocionnan desagradabel.
Pero no ta tarea di Cuerpo Policial pa guia, educa of controla e periodista den su trabao diario. Esaki ta keda na e periodista mes. E declaracion haci door Amigoe ta aproba violencia.
Imagina boso si polis mester permiti violencia “Den ki tipo di sociedad nos lo bibando?”. Polis ta pa garantisa orden publico y seguridad di comunidad di Aruba.
Altocomisario Arnhem ta haci suplica pa trankilidad, orden y respet pa otro. Acto di violencia ta na tur momento castigabel pa ley y por conta riba accion firme di polis.
