ORANJESTAD (AAN): Diadomingo marduga pa 3:05 am, un unidad di Polis di Playa tabata coriendo riba De La Sallestraat,
y ora cu e agentenan a bira na man robez pa drenta Indianenweg pa sigui nan caminda, nan a keda sorprendi pa mira cu tin un auto ta bin den verboden den nan direccion.
Indianenweg ta un caya di un solo direccion, pues bo por bay zuid so riba dje pa asina sali pabao di Maria College.
Polis a duna e chauffeur di e auto compacto Hyundai Atos un señal pa stop, y e chauffeur a cumpli cune.
Polis a baha y a bin haya un chauffeur masculino di habla hispano, y un muher Venezolano sinta como pasahero. Polis a pidi e chauffeur pa su rijbewijs Arubiano. Aki e persona a confesa na e agente, cu e no tin rijbewijs. Despues di esey, e chauffeur a declara na Polis cu e tin si un papel cu ta proba cu el a haci peticion pa Asilo Politico.
Despues e chauffeur a saca un rijbewijs Venezolano y a entrega esaki na Polis.
E chauffeur a declara na Polis cu e ta bibando 4 aña caba riba e isla, pero e no tin ningun permiso legal di estadia.
Pa puro casualidad net e ora ey un patruya di Departamento Guarda Nos Costa (GNC) a pasa den Indianenweg. Polis a stop nan y a informa nan di e caso.
Relaciona cu esaki, tanto e chauffeur di inicial M. naci na Venezuela, y e muher di inicial A. tambe naci na Venezuela, a wordo hiba pa Warda di Polis, pa despues nan wordo pasa pa Guarda Nos Costa.
Manera por mira riba e potret aki, Indianenweg tin claramente un borchi di ‘Verboden’. Pero esnan cu a pasa rijbewijs na Venezuela lo bisabo, cu aya nan NO ta usa e tipo di borchi ey. Riba e potret por mira e tipo di borchi cu Venezuela ta usa equivalente na ‘Verboden’.
