ORANJESTAD (AAN): Durante e siman cu a pasa, POH di Wit Gele Kruis tabata tin diferente evento cu e meta pa trece informacion valioso riba e tema di Diabetis.
Den un entrevista Coordinador di POH di Wit Gele Kruis Jasmira Mora a splica cu for di siman pasa Diadomingo caba POH tabata presente na e Walk & Run di Botica di Servicio.
“Nos a cuminza cu esey y e siman aki e POH-nan tabata hopi activo”.
International Diabetis Federation (IDF) algun aña atras a pone 2021 pa 2023 como logro pa hende tin acceso na cuido di diabetis”.
E aña aki a enfoca mas riba e parti di educacion y pesey nos como POH a pensa con nos por duna esaki un esencia y con nos por hacie tambe na Aruba.
Nos a bin cu idea pa duna les tambe na e muchanan un tiki mas jong, segun Mora.
El a sigui bisa cu mester cuminza for di jong, pasobra lamentablemente e edad di personanan cu diabetis y presion halto ta bahando.
Segun Mora, POH a haya un programa hopi bunita di IDF cu yama IDF Kids Program, unda cu nan mes a traha tur cos caba, esta e presentacion y folders entre otro, mientras cu docter Dellanire Maduro ta esun cu a haci algun cambio y a traduci tur cos na Papiamento.
En total 7 centro di tra'imerdia y varios scol basico a ricibi e programa aki yena cu informacion.
Muchanan di 5de y 6de klas specialmente a haya presentacion cu informacion cu nan por a compronde.
E muchanan a haya un goody bag y den e tas aki nan a haya un folder di IDF cu ta papia riba e importancia di entre otro un dieta balanza.
E intencion ta pa otro aña duna mayornan presentacion cu informacion, como tambe juffrouwnan di scol.
