Presupuesto 2023 di Hulanda lo ta marca pa problemanan mundial
*Segundo y Tercer Diamars di September y placa disponibel pa Aruba
*Riba “Prinsjesdag” Rey lo splica e plannan 2023 pa Reino Hulandes
ORANJESTAD (AAN) — Na momento cu na 2021 e “Miljoenennota” a wordo presenta na Parlamento Hulandes, ningun pais den Reino tabata prepara pa desaroyonan cu 2022 a trece y cu lo a nifica cambio pa e recuperacion cu a spera despues di Pandemia.
Na Hulanda, Prome Ministro Rutte ya a mustra bon cla kico e Guera na Ukraine a nifica pa Hulanda, Europa y henter mundo y e retonan cu a presenta y cu a haci cu e no por a tene un vacacion normal, ya cu den su vacacion e mester a sigui traha.
Pa haya un bista riba e realidad financiero na 2023, September 2022 ta bira sumamente importante pa Aruba como parti di Reino.
Na prome lugar riba e Segundo Diamars di September 2022, Parlamento di Aruba lo reuni pa trata e plannan di Gobierno pa 2023.
Su Excelencia Alfonso Boekhoudt, Gobernador di Aruba, lo habri e Aña Nobo di Parlamento di Aruba y lo presenta e plannan di Gobierno di Aruba pa 2023.
E realidad estatal di Aruba lo bini dilanti na momento cu e Representante di Corona Hulandes na nomber di Gobierno di Aruba, splica kico Aruba lo por spera den e aña venidero.
Un siman despues, riba e Tercer Diamars di September, Rey Willem Alexander riba Prinsjesdag lo dirigi su mes na Reino pa splica e maneho cu lo wordo hiba dor di Gobierno di Reino.
Despues di e ceremonia, e Ministro di Asuntonan Financiero di Hulanda y asina di Gobierno di Reino, lo presenta e Miljoenennota, den cual e cifranan di Reino Hulandes pa e futuro mas imediato, lo wordo presenta oficialmente.
Den e cifranan aki naturalmente e asistencia pa Aruba tambe ta inclui.
Dos siman pues den cual e futuro financiero y determinante di Aruba ta wordo presenta pa Pueblo di Aruba, na un momento sumamente importante den historia di mundo.
Prome Ministro Hulandes Rutte den publicidad a papia di e problemanan serio cu ta afecta henter Reino y cu a haci cu e mester a scrap un vacacion berdadero na 2022.
Hulanda y henter Reino Hulandes mester biba cu situacionnan nobo manera e siman aki el a discuti cu miembronan di Parlamento Hulandes, cu mester a interumpi nan vacacion pa atende e asunto serio aki.
Manera DIARIO na varios occasion a mustra, e poder di compra di e Hulandes mescos cu ta e caso cu e poder di compra di e Arubiano, a baha considerabelmente y esaki a haci cu Miembronan di Parlamento Hulandes a interumpi nan vacacion pa papia riba e tema aki pero tambe e problema cu medidanan relaciona cu cambio di clima ta trece pa produccion di carni.
E asina yama “stikstofprobleem” ta basa riba e problema cu sushi cju baca entre otro ta laga atras.
Si atende e problema manera e condicionnan di clima ta exigi, e lo por afecta e produccion di carni cu ta alimento pa hende.
Un momento importante ta bati na porta di Reino cu September 2022, cu ta splica e realidad cu cual Reino y asina Aruba mester atende na inicio di un epoca nobo, cu a basha realidad di Reino Hulandes abou mescos cu di henter mundo, manera e Prome Ministro Hulandes ta splica.
