Afluencia sin precedente di migrante y refugiado venezolano den Latino America y Caribe
*Mayoria procedente di Colombia, Venezuela, Republica Dominicana y Hulanda
ORANJESTAD (AAN): E situacion politico y economico actual na Venezuela a causa un afluencia sin precedente di hende migrante y refugiadonan den henter e region di Latino America y Caribe.
Segun dato di OIM/ONU Migracion, na juni 2024, mas di 7.77 miyon venezolano ta pafo di nan pais di origen, e di dos desplazamento mundial mas grandi.
Mayoria di imigrante y refugiado di Venezuela ta residi den e region (6.59 miyon den juni 2024). Entre e paisnan cu ta recibi e cantidad mas grandi di venezolano ta Colombia (2.9 miyon), Peru (1.5 miyon), Brasil, Ecuador y Chile.
A pesar di e progreso den regularizacion y e otorgacion di status di refugiado pa venezolano, hopi migrante y refugiado no tin documentonan migratorio, loke ta limita nan acceso na proteccion social den algun pais.
E migrantenan venezolano ta uza diferente ruta migratorio, incluyendo tera, lama y aire. Como consecuencia di e pandemia COVID-19 y e interupcion di e canalnan regular, hopi venezolano a tuma rutanan iregular pa yega na nan destino.
E crusamento fronterizo informal ta caracterisa pa nan condicion insigur y nan gran problema di proteccion, caminda hende ta wordo exponi mas y mas na trata di persona y otro tipo di violencia.
E pandemia di COVID-19 a pone un factor di complehidad riba e situacion di desplazamento den e region. E perdida generalisa di trabou y fuente di ingreso a resulta den un incapacidad mas grandi pa garantisa e necesidadnan basico, manera cuminda, cas y otro servicionan esencial. Ta wak un aumento di xenofobia y discriminacion contra e venezolano, motiva pa un percepcion eroneo di mas competencia pa trabou, criminalidad y miedo pa propagacion di virus.
Segun e estudio 'Impacto di Migracion Venezolano na Aruba' publica na Februari 2024, datonan di Oficina di Estadistica (CBS) ta mustra cu na 2020 e poblacion imigrante a alcansa 39.158 habitante, loke ta representa un 34.6% di e total di habitantenan, aproximadamente un tercer parti di e poblacion.
E grupo aki ta conforma principalmente pa inmigrantenan procedente di Colombia, Venezuela, Republica Dominicana y Hulanda.
