ORANJESTAD (AAN): Informacion procedente di isla di Bonaire, ta indica cu a registra un aumento di e poblacion di ‘Hulanda Caribense’ den 2023,
cu casi 1.000 persona. E islanan BES cu ta e ‘Hulanda Caribense’, ta Bonaire, St. Eustatius, y Saba.
Dia 1 di Januari 2024, e Islanan BES tabatin 30.397 habitante. Esaki ta ta 979 (3 porciento) mas cu un aña anterior. Pa gran parti, e motibo pa e aumento ta cu e poblacion di Bonaire a crece, principalmente door di migrashon.
Na Saba tambe e cantidad di habitante a aumenta door di un surplus di establecimento. Sinembargo, na St. Eustatius hustamente por a papia di un escasez di establecimento. Asina CBS di Estadistica a raporta a base di cifranan nobo.
Encuanto Bonaire: Poblacion Bonaire na 2023 a crece cu mas cu 1.000 persona. Bonaire tabatin 25.133 habitante dia prome di Januari 2024, cu ta 1.043 mas (4 porciento) cu un aña anterior. E motibo pa esaki tabata principalmente debi cu tabatin muchu mas hende cu a bay biba na Bonaire cu hende cu a bay for di e isla (941), y te na un cantidad limita door di crecimento natural (98, e cantidad di hende cu a nace menos e cantidad di hende cu a fayece). E cantidad di hende na Bonaire cu a nace pafo di Hulanda Caribense a crece cu mas cu 1.000 persona. E motibo pa esey tabata principalmente cu tabatin mas hende biba ey cu a nace na Republica Dominicana, Colombia, Venezuela, y Hulanda Europeo.
Encuanto St. Eustatius: Poblacion St. Eustatius a baha cu 89 persona. Dia prome di Januari 2024, St. Eustatius tabatin 3.204 habitante, 89 (3 porciento) menos cu na cuminzamento di aña 2023. E motibo pa esaki tabata principalmente cu tabatin mas hende cu a bay for di e isla cu hende cu a bay biba ey. E crecimento natural tabata limita. E cantidad di hende na St. Eustatius cu a nace pafo di Hulanda Caribense a baha cu 65. Principalmente e cantidad di hende cu a nace na Hulanda Europeo, na Merca y na Republica Dominicana a baha.
Encuanto Saba: Poblacion di Saba a crece cu 25 persona. Pues dia 1 di Januari 2024, Saba tabatin 2.060 habitante, 25 (1 porciento) mas cu un aña prome. Tabatin mas hende cu a bay biba na e isla compara cu hende cu a bay for di dje (60). E crecimento natural tabata limita. E cantidad di hende na Saba cu a nace pafo di Hulanda Caribense a aumenta cu 34 persona. Esaki ta principalmente hende cu a nace na Centro- y Sur America.
