ORANJESTAD (AAN): Comision pa celebra “Dia Internacional di Hende Muhe” di Centro di Bario Playa Pabao (CBPP)
ta invita nos hendenan muhe y nan pareha pa un anochi interesante y sumamente informativo en conexion cu Dia Internacional di Hende Muhe 2024.
E anochi aki lo ta na Centro di Bario Playa Pabao, diabierna dia 8 di maart anochi di 7:00 pm pa 9:00 pm . Entrada ta gratis. E sympatico y elegante notario señora Rodrigez-Taekema lo ta nos orador principal cu capitulo 2.
Riba peticion di e publico, cu ta desea mas di e temanan encuanto testament, partnerschap registra, schenking y e libertad pa laga duna bo pertenencianan na esun cu abo kier. E aña aki ta agrega e tema di erfpacht recht. Nos por corda e sala “full house” aña pasa y e tantisimo preguntanan.
Lo tin un ora social cu grupo di baile di CBPP, poemanan recita pa e poetanan Omaira Britten, Ruthy Vrieswijk y Ariana Koolman, cu ya por ser considera famia di CBPP y cu e dushi y fantastico canto di e homber “chikito grandi “ cu sa kico ta crea dushi ambiente cu su potente voz : Quincy Hasham, y un of mas cantante sorpresa e biaha aki. Lo tin mas sorpresa agradabel y bunita durante e anochi di celebra dia Internacional di Hende Muhe aki den CBPP pa nos bunita hende muhenan di Playa Pabao y vecindario.
Y lo tin un cariño sorpresa, recuerdo di e dia ey, pa e prome 50 muhenan cu yega CBPP. MC lo ta e dynamico cabayero presidente di CBPP Dennis Burke, e homber cu ta traha incansablemente pa su bario ya ta algo mas di 45 aña caba.
Danki na Martijn Trading cu fielmente ta regala CBPP productonan importante y essencial cu ta worde rifa den e publico presente. Di antemano danki na e demas instancianan cu ta coopera atrobe sea financieramente y of materialmente. Danki pa alegra e dia aki un crenchi mas .Den nomber di CBPP: Felis Dia di Hende Muhe.
