Hasta Aruba ta parti di un guera mundial cu ta destrui futuro --- *For di 2014 mundo a neglisha loke awe por bira guera mundial --- *E revelacion mas grandi ta e rikesa inmenso di lidernan Comunista
ORANJESTAD(AAN)—Mundo a drenta un impase? Mundo tin un salida pa e problema serio na Ukraine?
E pregunta aki mester wordo haci na un mundo cu a introduci un Nacionnan Uni pa evita un Guera Mundial atrobe pero te awe no ta capaz pa atende cu ningun guera cu presenta.
For di 24 di Februari 2022, normalidad na mundo a termina. Incertidumbre a conoce un nivel nunca pensa ora a bira conoci cu Rusia a invadi Ukraine y cu un Tercer Guera Mundial ta posibel.
E pregunta grandi ta na e momentonan aki, kico mundo kier haci.
Tur lider rond mundo ta papia un solo palabra: nan kier paz. Con hende por tin paz si drenta nan cas y mata nan, ta un pregunta cu ningun hende kier contesta y un situacion cu realmente tin un contesta.
Pa a saca Rusia for di Ukraine, e forma mas efectivo lo tabata cu lo a drenta Ukraine y manda Putin cas.
Pero esaki no por pasobra si bisa Putin cu fiesta a caba, Guera Mundial a cuminsa.
Nos conoce e situacionnan aki rond mundo. Hasta dilanti costa di Aruba tambe nos a mira con e situacion mundial ta funciona.
Te awe Nicolas Maduro ta na Miraflores cu gran gusto di bende petroleo. Tur Venezolano cu no ta contento, mester a bandona e pais.
Kico por spera di e situacion na Ukraine?
Pa ta sincero nos mester duna e Presidente di Ukraine razon.
Mundo a lanta para. Tur pais di NATO a manda tropa tur caminda. Nan a manda arma pa Ukraine pero ningun hende por haci nada.
Ukraine mester defende su mes te awe y famianan a wordo kibra pa asina evita cu mas mucha lo a wordo mata dor di Putin.
E loke mas ta haya atencion ta e cantidad di placa cu Putin y su grupo tin. Increibel cuanto placa un lider Comunista, cu a bini na poder como sindicalista, por considera su capital.
E yatenan di Putin ta un isla riba nan mes. Su amigonan por cumpra henter un continente cu e placa cu nan tin. Pero nan ta comunista.
Tempo nos a adverti nos lectornan, cu comunismo ta e mihor sistema capitalista, poco hende kier a kere. Awe tur hende mes por mira.
Awor kico ta bay pasa?
For di 2014 tabata conoci cu Putin por a ataca Ukraine ya cu e dos paisnan cu tabata ruman den Union Sovietico, tabata na guera pa motibo di Krim, cu Putin a anexa pero cu Ukraine ta considera su teritorio.
E problemanan entre Ukraine y Rusia ta data for di 2014 pero ningun hende ta mira peliger.
Cu kico por considera e situacion actual?
Putin ta menasa cu un guera nuclear. Na e momentonan aki bista di mundo ta fiha riba un planta nuclear, cu ta Chernobyl na Ukraine cu conoce e peliger di tur loke ta nuclear pasobra na 1986 tabata tin un explosion historico na e planta di Chernobyk y e actividad radio activo a mantene sigur henter Europa den suspenso.
Awe nos ta publica e forma cu radio actividad tabata propaga.
Con peligroso e planta ta? Na e momentonan aki e mondinan den vecindario ta na candela. Kico lo pasa si nan alcansa Chernobyl?
Algun hende ta papia di un drama cu lo menasa sigur Europa. Otro ta bisa cu no tin peliger.
Kico por spera di e situacion mundial?
Presidente Joe Biden a duna Putin cantidad di nomber. Pero ainda Putin ta riba su stul y ainda e ta mata y ta crea teror?
Esaki ta e problema mas grandi. Ukraine mes mester bringa su guera. Arma ta manda pero nada mas.
For di 24 di Februari 2022 nos conoce un guera mundial. Aruba tambe. Aruba tambe ta tene su mes na sancion contra Putin, cu por mata y destrui pasobra contra criminal ainda mundo no tin arma adecuado!
