ORANJESTAD (AAN) – Andres Hernandez, miembro di directiva di San Nicolas Business Association, a participa den e conferencia di prensa yama pa fraccion di MEP, y cu a tuma lugar den e caya principal di San Nicolas.
Hernandez a bisa cu SNBA ta trahando hunto cu e Gruponan Uni di Pariba, y pa Parlamentario Molina el a duna su opinion tocante e parti di planificacion di e ciudad. El a bisa cu pa nan ta claro, cu den e investigacion cu SNBA a haci, cu mester di un compania di afo cu planifica un ciudad ta loke nan ta haci. El a bisa cu na Aruba tin hopi bon profesional y arkitecto, pero no pa nan so, desaroya un plan manera e desaroyo di San Nicolas.
Pero un compania di afo por bin hunto cu Aruba su profesionalnan y deliver loke NSBA, gobierno y comunidad kier pa haci, pero cu e experiencia cu nan ta trece aden.
Tambe el a referi na ImSan, encuanto e fusion cu esnan den sector salud kier haci cu HOH, y a subraya cu mester corda cu e JAIA accreditation, ta duna Aruba e opcion di cuminza cu un mini turismo medico.
El a agrega cu ora e idea di e fusion a bin aden, San Nicolas a haya Inversionistanan grandi manera Martinon, Perret, y esnan cu ta biniendo y hasta localnan cu ta bay haci e marshe meymey di caya.
SNBA ta di opinion cu un cooperacion positivo y efectivo entre Hospital cu ImSan, unda ni un ni otro ta manda riba otro, ta duna e chens pa ImSan sigui avanza. ImSan tin e machine di bestraling di mas nobo na Latinoamerica, y un di esnan mas moderno cu incluso ta tratando pashentnan cu no ta di Aruba.
Hernandez a expresa cu, cu permiso di otro gruponan di pariba di brug, ta bisa cu SNAB ta hopi di acuerdo cu un colaboracion estricto entre ambos centro medico, pero cu di ningun forma e distrito 4 cu ta bin di Santa Cruz te punta basora, ta dispuesto pa perde e cuido medico, cu pa tanto aña San Nicolas a pidi pe, y cu awo ta birando realidad.
