Produccion mundial comercial ta subi pero benta no ta subi
*Destinacion turistico Aruba den un futuro internacional dificil
*Petroleo ta produci placa cu no tin pa proteha hende contra clima
ORANJESTAD(AAN)—E grupo cu mas ta sufri den e situacion mundial actual, ta e pobernan na paisnan cu no tin e base financiero pa enfrenta un situacion cu a cambia y lo sigui cambia.
Durante e fin di siman aki, lidernan mundial a bolbe na dos sala di reunion, cu manera nos a splica na final di 2021, ta representa dos interes grandi di mundo cu mester scoge pero tambe mester tin placa pa scoge.
Ora papia di medidanan cu e cambio di clima ta exigi, ta papia di gastonan enorme cu sigur paisnan chikito cu economia hopi limita no tin.
Pa comprende e actitud cu hopi kier a ignora ora a bini cu plannan mundial pa enfrenta e menasanan di cambio di clima, mester mira e hende cu tin problema pa entrega tur e comodidad cu el a haci costumber.
Cambio di clima ta exigi hende entrega hustamente loke mas e mester den e cambio di clima.
Na Aruba ta dificil pa bisa un hende, pa drumi den calor pa asina evita un menasa mas grandi di clima, cu ta trece mas calor y ta sigui subi prijs di coriente.
E problema ta simpel. Hende a ahusta su bida na e comfort cu el a conoce den temponan moderno, cu adelanto pero tambe basta problema nobo.
Durante dianan cu a pasa, na e Conferencia di Clima cu a tuma lugar na Egipto, mundo atrobe a discuti kico lo pasa cu e planeta como resultado di cambio di clima.
Paisnan pober ta den un problema grandi, pasobra salud di hende ta wordo directamente afecta dor di condicionnan sumamente calor na paisnan calor.
E pais pober no tin placa pa reemplasa petroleo y inverti den metodonan moderno pa entre otro produci y recicla coriente. Paisnan grandi a priminti asistencia, pero paisnan grandi mes ta den problema.
Costo di bida a subi rond mundo, loke ta bini dilanti tambe den comercio internacional cu ta mira cu entrada a aumenta pero no pasobra mas hende a haci compra, pero pasobra prijsnan internacional a subi.
Gobiernonan mester duna asistencia na hende mas pober y un pais manera Hulanda ya ta duna cuminda como asistencia pa su habitantenan cu sigur den e temporada friu, ta den problema.
Aruba como pais turistico, den su totalidad mester bay atende cu mas atencion cu e tema di cambio di clima y di prijs di petroleo pa dos motibo.
Den e pakete di medidanan total pa confronta cambio di clima, ta nota asuntonan manera transportacion cu avionnan cu ta sumamente necesario pa turismo.
E infrastructura no solamente pa e habitantenan mester wordo cambia pero tambe pa e bishitantenan, e turistanan, di cual Aruba ta depende.
Cu clima a cambia por mira den e cantidad di fenomenonan tropical cu a pasa den temporada di horcan 2022 den vecindario directo di Aruba cu un economia, cu lo exigi sumanan importante pa adaptacion.
E momento a yega tambe pa cuminsa papia na forma mas directo di e proteccion cu naturalesa di Aruba mester den un futuro cu cada aña ta bini mas cerca.
Prijs di petroleo lo sigui dicidi riba nivel di bida na 2023.
Na e Conferencia di Clima por a mira con e interesnan a presenta nan mes mas fuerte cu na 2022.
Paisnan pober cu ta bira victima mas grandi di desastre natural, ta sclama pa medida. Pero na mes momento, mas pais pober kier atrae industria cu ta produci pan y placa cu ta base pa comfort y loke mundo moderno ta considera importante pa calidad di bida, pero tambe menasa pa clima.
Esaki ta tambe na 2022 e realidad cu mas cu nunca tabata visibel na momento cu mundo a papia di e realidad di clima, pero tambe mester atende cu petroleo, cu probablemente lo mantene prijsnan halto na 2023 pa e poder cu petroleo ainda tin pa falta real di competencia como energia.
Un isla ta contempla horizonte, caminda retonan grandi ta sconde pa 2023, cu lo marca cambio cu tur pais y tur hende mester enfrenta cu responsbailidad.
